نجل أسامة عباس يتحدث عن محطات مهمة في مشوار والده: كان بيشتغل في المحاماة الصبح والفن بليل
تحدث نجل الفنان أسامة عباس عن بعض المحطات الفنية في حياة والده، وذلك خلال حضوره ندوة تكريمه في المهرجان القومي للمسرح في دورته 17.
وقال نجله الفنان أسامة عباس خلال الندوة عن مشوار والده الفني قائلًا: والدي بدأ مشواره محاميًا بيشتغل في شركة الصبح وبعد الظهر يروح المسرح، وفضل عشر سنين جامع بين شغله في شركة النصر لـ التلفزيون وبليل بيروح المسرح وده كان مجهود كبير بس كان حابب ده؛ لأنه بيحب الفن جدًا ومن ضمن الأسباب الأساسية أنه بيشتغل في الشركة الصبح والمسرح بليل ويجمع بين العملين، وكان ملتزم أن عنده أسرة لازم يعولها وقعد فترة جامع بين العمل في الشركة والفن.
نجل أسامة عباس يكشف عن النقلة الفنية في حياة والده
وتابع: كانت النقلة الحقيقية في مشوار والدي الفني، عند مشاركته في الفوازير مع ثلاثي أضواء المسرح وحصل معه تعارف سريع بينه وبين الجمهور، والناس بدأت تحبه والفوازير كانت محبوبة، واتجه بعدها أنه يبقى ممثل فقط، وهو كان وارث حب الفن من جدتي، لأنها كانت بتحب الفن وبتحب تتفرج على الأفلام وده مش متعارف عليه، وكان عندها جهاز سينما.
وأضاف: بالنسبة للثقافة جدي كان عنده مكتبة ووالدي كمل عليها وهي مكتبة ثرية جدًا وفيها جزء كبير من الكتب التاريخية والمجلات وعنده مجلدات من سنة 20؛ لأنه كان عاوز يعرف ساعتها الحياة عاملة أزاي، وكان بيروح سوق الأزبكية ويشتري المجلدات القديمة، وكان بيقرأ في المجلات وكان ليها تأثير كبير وده استمر معاه كتير، وكان عنده فرصة للالتقاء بكتاب كبار زي أنيس منصور وجمال بدوي وغيرهم، وكانوا بياجوا زيارة لينا البيت، وده كان بيدينا الفرصة نتعرف ع الناس العِظام ونتكلم معاهم.
وتابع: أنا وأخواتي طلعنا بنحب الكتب والقراءة مثل والدي، وأنا باخد منه كتب بدل ما أشتري وهو بيحب المزيكا، فكلنا طلعنا بنحب المزيكا مثله، وبيفضل طول الوقت ياخد رأينا في أعماله وهو مقدمش أعمال وحشه في تاريخه الفني.
وفي السياق ذاته، رد نجل الفنان أسامة عباس عن السبب وراء عدم دخوله الوسط الفني مثل أبيه هو وأشقائه قائلًا: مش شرط علشان أبويا فنان كلنا نطلع فنانين، هو كان مدينا فرصة وحرية الاختيار ولكن بشرط نخلص الدراسة والجامعة، وأنا وأخواتي درسنا في جامعات مختلفة، ومكنش فيه مجال أو فرصة نتجه لـ الفن وأنا كنت بشتغل في شركة في فترة من الفترات كان بيكون فيها نشاط فني وحد قال لي هنعمل مسرحية صغيرة وقال لي أجيب لك مخرج وكان عاوز يساعدني لكن التجربة ما أكتملتش وممكن ميكونش عندنا الموهبة بتاعته وأحفادي كلهم بيحبوا الفن لكن مفيش حد اتجه لـ الفن لكن كلهم بيحبوا الفن والمزيكا وبيكونوا سعداء أما يتفرجوا على أعمال لوالدي خاصة الحاجات القديمة بتمثل فترة بعيدة عنهم بالنسبة لهم شيء مختلف تماما.
أما عن سؤال أكثر الأعمال المختلفة من وجهة نظره لوالده قال: أعتبر فيلم الحاوي من أكتر الشخصيات المختلفة تماما لوالدي من وجهة نظري، ووالدي أب زي كل أب مهتم وبيحب ولاده ومفيش اختلاف بين أنه فنان أو لا هو نفس الاحساس، ولكن الحاجة اللي بتزيد أن الناس عارفاه وبتحبه وده بيسعدنا وسعيد اني موجود في مكان الناس بتكرمه فيه.
نجل الفنان أسامة عباس: بيتشاور على أبويا وبيقولوا فنان محترم
واختتم حديثه قائلًا: لحد دلوقتي الناس لسه بتحبه وبتسأل عليه وده بيسعدني، وبيديني سعادة كبيرة سعيد أني موجود في مكان الناس بتحبه فيه ومن ضمن الحاجات اللي بتسعدني لما بيتذكر اسم أبويا ويقولوا الفنان المحترم، والناس بتحبه.
وفي سياق آخر اعتذر الفنان أسامة عباس عن حضور ندوة تكريمه، المقرر إقامتها اليوم الخميس، ضمن فعاليات الدورة الـ17 لمهرجان القومي للمسرح المصري، وقالت زوجة الفنان أسامة عباس، في تصريح خاص لـ القاهرة 24، إن الفنان أسامة عباس اعتذر عن حضور التكريم لظروف خاصة ومن المقرر أن يذهب نجله للندوة بديلًا عنه.
