محمد رياض: تكريم النجوم الراحلين هيفيدهم بإيه وهما بين إيدين ربنا؟
علق الفنان محمد رياض، على انتقادات عدم تكريمه للنجوم الراحلين خلال الدورة الـ 17 من المهرجان القومي للمسرح المصري، معربًا عن استيائه الشديد بسبب حصر المهرجان في التكريمات وعدم الاكتراث لباقي فعاليات المهرجان.
وقال محمد رياض، في لقائه مع القاهرة 24: الناس مبيعجبهاش حاجة عمومًا، بس أنا مؤمن من زمان جدًا دي كانت وجهة نظري، أن يا جماعة الفنان محتاج يتكرم وهو عايش بحياته، أنا كمحمد رياض لما أموت دلوقتي هيفيدني بـ إيه التكريم وأنا بين إيدين ربنا سبحانه وتعالى؟، هبقى في عالم آخر غير عالمنا.
وأضاف محمد رياض: اللي بيتكرم في الآخر بيكون أولاده بيستلموا التكريم بتاعه عن أعماله وتاريخه وأنا مش ضد تكريم الراحلين، بس الفنان يتكرم في حياته ويحس بتكريمه وشكر زملائه، دي اللحظة الحلوة بتاعة الفنان وأنا فنان وأحسها.
وأضاف: الناس مبسوطة أوي من تكريم النجوم الأحياء في الدورة الحالية من المهرجان، بدليل أن الناس كل سنة بيتخانقوا على التكريم، طب أنت مش مقتنع ليه إذا كان بتتخانقوا علشان متكرمتوش؟، بصراحة الموضوع بقى ممل والمهرجان حولوه لـ تكريمات، المهرجان ده صعب وكبير وبشتغل فيه سنة بحالها، المهرجان ده عبارة عن تكريمات وورش وعروض مسرحية وحاجات كتير جدًا، مش هحصره في التكريمات.
واختتم محمد رياض: مع ذلك أنا مقولتش لـ اللي متكرمش أنه ميستحقش التكريم، بالعكس تستحق التكريم وليك مجهود كبير واديت للمسرح، بس إحنا في الآخر عندنا 10 مكرمين، وأنا ماليش مصلحة مع أي حد نهائي، ولا أنا عايز حاجة من حد وأنا بشتغل بما يرضي ضميري وشايفه مظبوط، ومن خلال لجنة كبيرة 12 قامة فنية مسرحية كبيرة، يعني مسألة مش معمولة بشكل شخصي.
