شهيرة بعد إشادة الجمهور باعتذارها لسيدة انفعلت عليها: معرفش اغلط في حد ومعتذرش.. وكنت متنكدة رغم مرور 5 سنوات
تحدثت الفنانة شهيرة عن تفاصيل اعتذارها لإحدى السيدات بعد مرور خمس سنوات، حيث فصلت لها هذه السيدة “ملاية” ولكن لم تعجبها حينها وانفعلت عليها.
وقالت شهيرة لـ القاهرة 24: كانت أعصابي مشدودة ومتوترة وطلبت بعض التعديلات واتكلمت معاها بعنف وقفلنا، وكل ما أجيب الطقم أفتكر الموقف وابقى متنكدة وزعلانة إني كنت عنيفة مع الست الجميلة دي وبكون عاوز أتواصل معاها ومش عارفة، وعدى أكتر من خمس سنوات ومكنتش مركزة أوي وكنت مركزة مع جوزي ومرضه، ومش فاكرة اسمها ولا البراند بتاعها.
وأضافت شهيرة: مضت الأيام والسنين وأنا الموضوع ده معلق معايا ومكنتش المفروض اعمل كده معاها والموضوع مش مستحق وكنت عاوزة اقولها متزعلش لاني ظروفي كانت صعبة وقتها، وكل ما بجيب الملايات وكل فترة طويلة لما بفرش الملاية بفتكر فازعل من نفسي وبكون عاوزة اتواصل معها بأي طريقة، وملقتش غير الطريقة دي ونشرت جزء من الملايا قلت لعلى وعسى تشوفه لأن تليفوني عندها.
وأكملت شهيرة: بشكر الناس كلها واللي شيروا البوست على أساس أنها حاجة مش بتحصل ونادرة ولكن أنا لما بحس أني تجاوزت مع أي حد بروح بعتذر له وببقى مرتاح نفسيا ومعرفش اغلط في حد ومعتذرش لكن عندي ثقافة الاعتذار.
وأردفت: ولو مش هيكون له فايدة لكن على الأقل الناس شافت تصرف وفسروه على أنه راقي ونادر في الزمن ده زمن انهيار الأخلاق للأسف، وبقول يا رب الناس تتعلم ثقافة الاعتذار وأنا لما اعمل تصرف مش لائق ايا كان الحد ده لازم اعتذر له وأطيب خاطره وأتمنى الحكاية دي تكون موجودة عند كل الناس.
