شاهد بواقعة تسبب 7 أشخاص في وفاة سوداني بالهرم: طلع مع واحد منهم وبعد 3 ساعات وقع من فوق
حصل القاهرة 24 على نص تحقيقات القضية رقم 54143 والمتهم فيها 7 أشخاص لاحتجازهم شخص على إثر وجود معاملات مالية بينهم سالبين حريته، حيث تطور الأمر إلى محاولة المجني عليه الهروب من خلال الشرفة ولكنه سقط أرضًا، الأمر الذي أحدث إصابته التي أودت بحياته.
قضية وفاة شخص سوداني بالهرم
واستمعت جهات التحقيق لأقوال حارس العقار والتي جاءت كالتالي: اللي حصل إني شغال حارس في العمارة رقم 69 بالمريوطية عايش هناك في شقة في الدور الأرضي أنا ومراتي وبنتي، ويوم السبت اللي فات الموافق 25/ 11/ 2023 حوالي الساعة 4 العصر، جه المتوفى ومعاه واحد اسمه أمير ساكن عندنا في العمارة في الدور الثامن ودخلوا العمارة.
وأضاف: بعدها بشوية جه واحد اسمه أدهم قالي أنا طالع لأمير وقعد عنده حوالي ربع ساعة ونزل ومشي، وبعدها بحوالي 3 ساعات سمعنا صوت دبه كبيرة ولقيت الناس بتقول ده في واحد واقع من العمارة عندكوا في الشارع اللي ورا، جريت أشوف مين لقيت الواد اللي كان طالع مع أمير وكان واقع بيطلع في الروح والناس عماله تسأله إيه اللي حصل، وهو كان بيقول أدهم أدهم ومتكلمش تاني والناس كلمت الإسعاف وجم خدوه وأنا طلعت على العمارة عشان أتأكد هو اللي كان طالع مع أمير ولا لاء، وأنا داخل على العمارة لقيت حماة أمير نازلة ولابسة نقاب والطبيعي إنها مبتلبسش نقاب فسألتها إنتي لابسة نقاب ليه، قالت عشان حاطة مكياح وقولتلها انتي كنتى عند أمير قالت أيوة وسبتها تمشي.
وأردف: وطلعت العمارة للسودانيين اللي ساكنين أسألهم على الواد اللي وقع عشان شكله سوداني بس محدش قالي حاجة لحد لما افتكرت إن الواد ده اللي كان طالع مع أمير، وخبطت على أمير لقيته مشي، وبعدها بشوية لقيت الحكومة جت وطلعوا الشقة وخبطوا ملقوش حد وفتحوا الشقة ودخلوا فتشوا وسألوني على اللي حصل فحكيتلهم اللي شفته ومشيوا.
