ماجد المصري: تامر حسني عنده نزعة دينية زيادة عن اللازم
كشف الفنان ماجد المصري، سرًا عن حياة المطرب تامر حسني، بجانب حديثه عن زواجه من زوجته الحالية.
وقال ماجد المصري: تامر حسني عنده نزعة دينية زيادة عن اللازم.. كنت عنده في بيته في شهر رمضان وفي صلاة الفجر كان هو الإمام، حسيت إنه بيستمتع وهو بيقرأ قرآن.. هو أكيد مش هيتكلم عن ده طبعا وكان بالنسبة ليا قريب أوي من ربنا وقلبه حلو.
مقلب بين ماجد المصري وغادة عبد الرازق
كما روى ماجد المصري موقفا له مع غادة عبد الرازق خلال تصوير مسلسل مع سبق الإصرار، حيث نفذ مقلبا بها، قائلًا: كنا بنصور مع بعض مع سبق الإصرار.. قلت لها تعالي عايزك وسألتها أنتي كويسة قالت اه.. قلت لها أنا شفت لك رؤيا أن في جنازير في إيديكي ونار في أطراف شعرك وأنتي بتحاولي تفكي نفسك.. وقلت لها أنا حكيت لصديق الرؤيا وقالي فيه دعاء معين لازم تحفظه وتقوله بعد الصلاة لأن الرؤيا دي مش حلوة.. قالت إيه الدعاء… قلت لها قولي ورايا اللهم اكفني شر الكاميرا الخفية وانفعلت جدًا وقالت أقسم بالله ما هسيبك.
وتحدث ماجد المصري عن والدته الراحلة، قائلا: أمي كانت بتقولي أنت متعب واللي هتتجوزها هتتعبها وأنا فعلا تاعب مراتي، ودائما تقولي أنت متعب ما تفكر تسافر.
ماجد المصري يتحدث عن قصة زواجه
وعن قصة حبه وزواجه من زوجته الحالية، قال: رنا مراتي من طنطا وهي بنت خالة صديق عمري، كنت بروح أفراح العيلة أهزر وأقول أنا هخطب البنت دي لما تكبر، ولكن هي خدت الكلام جد، وأنا كنت بهزر، جت عيد ميلاد ماهيتاب بنتي ولقيت رنا الطفلة دي كبرت، قولت لصديقي أنا هخطبها قال لي لا أنا خطبتها، قولت له هتسيبها، واتضح أنه كان بيشتغلني.
