كنا هنتقلب كذا مرة.. شكاوى ضد شركة WE Bus للرحلات: سواق غير متزن.. ومحدش بيرد علينا
اشتكت سيدة تدعى يوستينا بشرى من شركة we bus للرحلات، مؤكدة أن حافلات الشركة غير آدمية والسائقين غير متزنين، بالإضافة إلى عدم ردهم على شكاوى العملاء.
شكاوى ضد شركة WE Bus
وروت السيدة لـ القاهرة 24 تفاصيل رحلتها مع الشركة، قائلة: حجزنا باص للرجوع من نوبيع للقاهرة جالنا واحد غير آدمي والتكييف بتاعه بايظ في درجة حرارة 40 درجة مئوية، في حين أن سعر التذكرة أعلى من الذهاب أصلًا.
واستكملت: لم ينتهى الأمر عند هذا الحد، بل تم الاتفاق على حجر 4 مقاعد، ولم تبلغنا الشركة أن هناك رجلًا أجنبي الجنسية بجانبنا.
كنا هنتقلب..والشنط بتطير
وقالت: إحنا 4 بنات فضلنا قاعدين جنب واحد غريب جاي من الأردن بري لمدة 10 ساعات، ده غير إنه أخد مساحة كبيرة جدا من الباص لحاجاته اللي كانت مريبة لكل الركاب لأن شنطنا كلها كانت مربوطة فوق، وده طبعا وقفنا وقت طويل جدا في الكماين لأن السواق مبلغش إنه معاه أجنبي.
وأضافت السيدة: أبلغت شكوتي للشركة خلال الرحلة ولكنني لم أتلق أي اهتمام منهم، إلى أن بدأ السائق في السير في طرق لم يعرفها مطلقًا، فضلًا عن اختلال عجلة القيادة منه أكثر من مرة، معقبة: كنا هنتقلب أكتر من مرة بسببه وشنطنا كانت بتطير، وأكدت السيدة أنه فور انتهاء الرحلة أبلغت الشركة بشكوتها لكن الشركة لن تستجب لها بأي رد.
فيما اشكتت سيدة أخرى على متن هذه الرحلة، وقالت في تصريحات خاصة: كلمتهم على الخط الساخن بعد ما وصلت، وكلموني بلامبالاة مبالغ فيها، وقالولي هنشوف ونكلمك ومحدش كلمني.
بالإضافة إلى عميل آخر، نشر عبر وسائل التواصل الاجتماعي شكواه ضد شركة وي باص، قائلًا: إحنا كنا حاجزين مع we bus رحلة من القاهرة لنويبع والسواق أول حاجة جه متأخر ساعة وكان شخص مش متزن تماما مش عارفين بقي شارب إيه واتحركنا كان ماشي بسرعة جدًا وبتهور بعد نص المسافة كده زود السرعة والشنط على العربية من فوق فضلت تترزع راح هو نزل قال بيعدلهم ورجع ساق بسرعة جدا تاني وفجأة سمعنا هبد جامد ووقف العربية لقينا الشنط وقعت واتكسرت والهدوم بقت على طريق السريع مرمية في كل حتة وحاجات ضاعت وحاجات اتكسرت وهو متنح ومش بيتحرك بنكلمه نلاقيه تايه ويقولنا أصل الشنط فرقعت، كلمنا الشركة قالوا ابعتولنا صور الحاجة وهنكلمكم طبعا ولا عبورنا إحنا اللي فضلنا نتصل نقولهم محتاجين شنط نروح بيها إحنا هدومنا في شنط بلاستيك راح واحد اسمه محمد ده بيقول إنه مدير الفروع قالنا أصل الشروط (policy) بتاعت الشركة إن عوض الشنطة اللي تضيع ٥٠٠ جنيه باللي جواها فا إحنا هنديكم ٥٠٠ أصلا عشان ناخد عربية لمكان نجيب منه شنطة بـ٤٠٠ جنيه قولناله إحنا عايزين شنط مش فلوس فضل بماطل فينا.
وتابع: واحد تاني كلمنا قلنا إحنا هنديكم 800 جنيه للشنطتين ده بعد ما كانوا 500 جنيه للشنطة وكل ده وحتي محدش بيعتذر وأسلوب ذي الزفت وآخر حاجة واحدة اسمها أسماء دي مفروض مديرة مكتب الشكاوى اتكلمت بطريقة زي الزفت وتقولنا ما إحنا قولنا هنديكم 800 جنيه وأن إحنا مش بنتصل بيهم وإحنا كنا بنكلمهم كل ساعتين وردها إنها صاحبة القرار وإنها هترد علينا رد نهائي الخميس ومحدش اتكلم عشان بيضيعوا الوقت ومعاد سفرنا يعدي وبلغناهم كذا مره إننا مسافرين الجمعة الصبح ومش بيرد علينا أصلا وفي الآخر لا أي حاجة حصلت لحد دلوقتي.
واختتم منشوره قائلًا: دي شركة مش محترمة ومش أمينة على حياة الناس وعلى حاجتهم ومش فارقلهم أصلا.
