ملتزم في الصلاة وبكلم ربنا.. أبرز تصريحات شادي شامل
حل الفنان شادي شامل، ضيفًا على أحد البرامج التلفزيونية، وتحدث خلال اللقاء عن تفاصيل حياته الشخصية والفنية، بجانب الكشف عن رأيه في المثلية الجنسية، مؤكدًا أنه يعرف أشخاصًا مثليين ولكنه ضد المثلية.
أبرز تصريحات شادي شامل التلفزيونية
- والدي كان شديد وصارم جدًا معايا، وأنا بشكره على الشدة رغم إن حنية الدنيا كانت فيه، وأنا أولادي بيهابوني ومن البصة بيفهموني.
- أبويا مات بعد ما جاله كورونا بـ أسبوعين، وكنت منهار واتكسرت، أصعب إحساس في الدنيا حسيته لما أبويا مات، كنت عايز أقعد في البيت وأعيط، ومعيطش على حاجة تاني بعد أبويا.
- أنا طول عمري ملتزم بالصلاة، أكيد ساعات بقصر غصب عني، وأنا بتكلم مع ربنا وبستغفر كتير، ومبتقبلش موضوع الإلحاد وقابلت ناس مهزوزين وبكلمهم بالحُجة وفي منهم بيقتنعوا، ومبدخلش في جدال مع اللي بيقولوا مفيش ربنا.
- القضية الفلسطينية مش هتتحل غير لما الوطن العربي كله يتحد، ده الحوثيين لوحدهم مغلبينهم وحماس، تخيلي لو كلنا اجتمعنا.
- والدي ووالدتي منفصلين وعلاقتهم غاية في الاحترام، واحنا 5 أشقاء وأنا أكبرهم، وإخواتي غير أشقاء ولكن عمر ما ده أثر علينا ولا حسينا بيه.
- ربنا مديني حتة معينة إني بعرف أتخطى، ودي نعمة من عند ربنا، وبقيت قوي لما عيشت لوحدي في مصر وأنا عندي 19 سنة، والوحدة لذيذة جدًا وبتعمل كل حاجة براحتك وهدوء.
- عمري ما جربت المخدرات وأنا دايمًا عندي سقف للغلط، والمخدرات بتاعتي كانت المزيكا، ومنجرفتش في أي حاجة ودي نعمة من ربنا، أكيد عرفت بنات طبيعي ما أنا راجل.
- كنت متجوز وأنا عندي 23 سنة، ست فاضلة جدًا وهي كانت أول حب حقيقي في حياتي، وخلفت منها ولدين، والانفصال جه من عند ربنا وعلاقتنا جميلة.
- أكيد حبيت تاني بعد انفصالي، وبفكر في الارتباط تاني إيه المشكلة؟.
- أنا بحب الست لما تبقى ذكية وعاملة غبية، ولازم يكون شكلها حلو وده مهم جدًا بالنسبة ليا، وأحب الست اللي تختارني.
- أوعي تصدقي حد يقول إن الراجل هو اللي بيختار الست، الست هي اللي بتختاره.
- أنا واثق من نفسي وده مش غرور ولا تكبر، أنا بحب ومعجب بشكلي وجسمي، وبصحى الصبح أبص لنفسي في المراية وأدلع نفسي، وأنا عملت بوتكس وكل فنانين مصر بيعملوا بوتكس.
- مش عيب إن الراجل يهتم بنفسه ولازم يبقى شكلي كويس قدام الستات.
- حسيت بقهر لأن كان عندي حق في حاجة، والحقائق اتقلبت.
- الفيسبوك بتاعي اتقفل بسبب أني اتريقت على المثلية الجنسية.
- أنا ضد المثلية الجنسية، وقابلت في حياتي ناس مثليين وبتعامل معاهم عادي، ولكن ميفرضوش عليا رأيهم ويقولوا إن ده عادي، إحنا اتربينا إن الراجل يحب الست والست تحب الراجل.
- كان في ممثلة مصرية عملت عملية تحويل جنسي، وهي مش معروفة ولكن لو في حاجة طبية تستدعي ده تمام، ولكن متبقيش واحدة ست وتيجي تقولي عايزة أبقى راجل، إيه القرف ده.
- مش هعرف أنافق ضميري وأقول على المثلية الجنسية حرية شخصية.
- أنا مزيكتي مختلفة وده مش غرور، ولكني متأصل وعارف المزيكا الشرقي الصح ومقتنع أن في يوم من الأيام الذوق العام هيبقى كويس.
- المهرجانات بتوجعلي ودني ومببقاش طايق اسمعها، ولكن فيه مهرجانات حلوة وعمرة كمال صوته حلو.
- مزيكة المهرجانات مش رايقة، إحنا مكناش كده.
- على قد ما أنا بلبس وبعمل ولكني راجل قديم.
- بحب بهاء سلطان وعمرو دياب وتامر عاشور، وشيرين عبد الوهاب، وأنغام، وجنات، وآمال ماهر، وسميرة سعيد حبيبة قلبي.
- بعمل أغنية جديدة مع سميرة سعيد، عملت لحنها ولسه هتنزل الفترة اللي جاية.
- كان في مشروع مع نجم كبير ومتمش، ويمكن أنا السبب ولكن اللي حصل سوء تفاهم بس.
- في واحدة سيبتها لأني بستحمل كتير في العلاقة، بس خلاص بختفي مرة واحدة من الحياة.
- طول ما العلاقة بين الراجل والست وصلت للندية يبقى الموضوع خلاص.
- اتقالي قبل كده مرتين إني مغرور، ولكن دي حاجة عكس طبيعتي، الستات مبتفهمش أني عايز أخد جنب وهادي، الهادي بيتقال عليه مغرور.
- الست لو احتدت على الراجل وصوتها علي وهو سكت هيحصل دمار، فلازم نقطع العلاقة أول ما توصل لكده.
- نفسي أعمل قصة سفاح التجمع، دي مليانة دراما، نفسي أعمل شخصية مركبة زي دي.
- مفيش صداقة حقيقية أوي في الوسط الفني.
- الوسط الفني فيه واسطة، وفيه ممثلات جداد خدوا فرص.
- أنا راضي وربنا مديني الستر، عندي سلام نفسي وده مهم.
- أنا مبحبش البرامج اللي بتسخن طرف على طرف، الراجل راجل والست ست.
- وقت مسلسل عبد الحليم مكنش فيه داتا عنه زي دلوقتي، ولا كنت أعرف هو كان بيتعامل إزاي في البرامج.
- تعبت جدًا في مسلسل عبد الحليم حافظ وقعدت 7 شهور بصور، وسافرت لندن.
- إيه المشكلة لما البس سلسلة؟ ما أحمد رمزي كان بيلبس سلسلة.
- أنا مش خارم ودني، وساعات بشوف انتقادات بشعة هرد على مين ولا مين.
- الناس بقت ظالمة.
- محدش يقدر ينتقدني أو يهاجمني في وشي.
