حنان شوقي تعلق على شائعة زواجها من طارق الدسوقي
علقت الفنانة حنان شوقي على شائعات زواجها من الفنان طارق الدسوقي، والتي انتشرت خلال الفترة الماضية، قبل أن ينفيها الفنان بنفسه.
وقالت حنان شوقي لـ القاهرة 24: طارق الدسوقي صديقي وأخ عزيز عليا وولاده إخواتي وأصحابي وصديق غالي، وكنا مع بعض في مهرجان بابل قبل الإشاعة.
وأضافت حنان شوقي: اكتشفت أن الناس بتحب تتكلم في سير الناس ويقعدوا ينموا وأن كل حاجة على السوشيال ميديا غير حقيقية، وبالرغم من أني إتسألت عن زواجي من طارق الدسوقي وكتبت في كومنت على صفحتي ونفيت، لكن كانوا مصممين على الإشاعة اللي مطلعينها.
واستكملت حنان شوقي: فيه ناس عاوزة تشغل نفسها بأشياء غير موجودة وتعمل إشاعات على الفاضي، والسوشيال ميديا بقت عاملة زي الجرايد الصفرا.
وأكملت: أنا مش بحب الهري في كلام الناس ولا على أعراض الناس، وصعب أقعد مع صحاب ليا وأتكلم على حد، ومعرفش القيل والقال ولا أحبه، لكن دايمًا يتقال حنان شوقي اتجوزت.
حنان شوقي: أتمنى أتزوج وأخلف
في سياق متصل، أكدت حنان شوقي أنها لا تمانع الزواج مرة أخرى، وتتمنى أن تتزوج وتنجب، وبشأن مواصفات شريك أحلامها قالت: مش إنتي اللي بتحددي ربنا هو اللي بيحدد وربنا كاتب كل حاجة وربنا كاتب لكل واحد هيتجوز مين واسمه إيه وهيخلف قد إيه، ربنا خيرنا في حاجات كتير لكن لها علاقة بالشر والخير لكن بتلاقي نفسك بتسعي للي مكتوب لك.
