محمد ممدوح: بحترم دماغ الجمهور في اختيار أعمالي.. وبنتي بدأت تثور عليا لانشغالي بالفن
تحدث الفنان محمد ممدوح عن كواليس مشاركته في فيلم إكس مراتي الذي من المقرر عرضه خلال الفترة المقبلة بدور العرض السينمائي بطولة هشام ماجد وأمينة خليل ومن إخراج معتز التوني.
وقال محمد ممدوح في لقاء تليفزيوني عبر سكايب، إن الورق حمسه للمشاركة في الفيلم بجانب تعاونه مع هشام ماجد والمخرج معتز التوني، قائلًا: الورق شجعني أوي، ومن زمان كان نفسي اشتغل مع هشام ماجد وحاجة تشرفني لأني من معجبين هشام وبحب اتفرج على أفلامه وشغله ومعتز التوني مخرج خطير، والمنتج أحمد يوسف أخويا والورق حلو وهشام ماجد الجندي المجهول في الفيلم لأنه اشتغل على الورق كتير مع المؤلفين وأنا اتبسطت جدًا واكتشفت صديق وهو فنان كبير حقيقي وملهم وبيفكر وخطير إلى جانب أنه جدع وراجل، والفيلم مأخوذ عن قصة فيلم أجنبي واتمصر.
محمد ممدوح يتحدث عن عودته للكوميديا
وعن عودته للكوميديا واللايت أوضح أنه لا يفرق معه طبيعة العمل بقدر اهتمامه بالنص، قائلًا: الورق الحلو لما يعجبني بوافق وبحس إني بعمل حاجة جديدة ومش بيفرق معايا كوميديا أو تراجيديا وبحترم دماغ الناس في الشغل وبحاول أقدم حاجة جديدة ودي حاجة مهمة للصناعة.
محمد ممدوح يتحدث عن التعاون مع أمينة خليل
وعن التعاون مع أمينة خليل في أكثر من عمل وآخرها فيلم إكس مراتي وأهل الكهف أضاف: أمينة خليل فنانة شاطرة ونجمة كبيرة، والنجم ده من رأي طريقة تعامل وتصرف وطريقة تناول واختيار مش مجرد الناس بتشاور عليه، لكنه لقب كبير وهي تستحقه وهي نجمة بتدخل المكان بتوه وبتعرف ازاي تختار وبالصدفة البحتة بيتم اختيارنا في أعمال فنية مع بعض وهي شاطرة وبتترسخ في كل الأدوار، واتحدت نفسها في فيلم شقو.
وتحدث محمد ممدوح عن تعاونه مع المخرجين أحمد الجندي ومعتز التوني في أعمال سابقة قائلًا: الاتنين مخرجين كبار وأسامي كبيرة ومفيش اختلاف وكل واحد له طريقته في التعامل مع الممثل أو الاسكربت وأحمد جندي علامة مميزة بالنسبة لي وعملت معاه بنك الحظ وكل ما اشتغل معاه الحاجة بتكون خطيرة وله ملحوظات هايلة وهما الاتنين أساتذة كبار وهما كمان صحاب فشبه بعض جدًا ودي حاجة ممتعة ومعتز مرن جدًا والتغيير بالنسبة له حاجة مهمة جدًا.
كيف يوزان محمد ممدوح بين حياته الشخصية والمهنية
وكشف محمد ممدوح عن كيفية توازنه بين حياته الشخصية وعمله في التمثيل قائلًا: ساعات مش بنجح بس بحاول وأهلي بيراعوه ده ومراتي بتراعي ده لكن كاميليا بنتي بدأت تثور عليا وبكون عاوزة أقضي معاها وقت كتير وده هيكون مفيد ليها وليا أنا كمان نفسيًا، والفترة اللي فاتت كان فيه زحمة بس كانت متفرقة على كذا سنة.
