حقي وصل صداه للعالم كله.. تعليق جديد من طبيبة المراغة بعد الصلح مع المحافظ
لا والله ما خلصت بصورة.. بهذه العبارة ردت سمر أنور طبيبة مستشفى المراغة المركزي وصاحبة واقعة التعنيف من محافظ سوهاج، على ما جرى خلال الساعات الماضية بعد تداول الواقعة وصورتها مع المحافظ.
تعليق جديد من طبيبة المراغة بعد الصلح مع المحافظ
وقالت الطبيبة في منشور لها عبر صفحتها على الفيسبوك: خلصت بمعيّة الله ودعم الناس وإن حقي وصل صداه للدنيا كلها، جوه مصر وبرة مصر وخلّت العالم كله ياخد باله من أي تصرف تجاه أي موظف وخاصة الطاقم الطبي وخاصة الأطباء.
وأوضحت الطبيبة: لا والله ما خلصت بصورة لكن خلصت باعتذار رسمي من رئيس مجلس الوزراء الدكتور مدبولي، واعتذار ومكالمة هاتفية ولقاء مع وزير الصحة الدكتور خالد عبد الغفار، واعتذار رسمي ومداخلة تليفونية مع اللواء عبد الفتاح سراج محافظ سوهاج، وده كله في صالح كل طبيب بإذن الله.
وأكدت الطبيبة أن ما حدث من رد فعل يأتي في صالح كل طبيب، مضيفة: مفيش حاجة خلصت بصورة، كل حاجة خلصت في يوم لكن عدى علينا كأنه سنين، مفيش حاجة كانت سهلة زي ما سوء الظن سهل، لكن موعدنا مش الدنيا، موعدنا مع رب العالمين، وزي ما بيقولوا اللي على البر عوام.
واختتمت الطبيبة كلامها: حقيقي بشكر كُل حد ساندني ووقف معايا ولو بكلمة، وحقيقي مُمتنة لكم حدّ السماء، بقرأ تعليقاتكم ورسائلكم ومبسوطة وبدعيلكم ربنا يجبر خواطركم وينجيّكم من أي محنة، شكرًا لحضراتكم ورزقكم الله الفردوس الأعلى من الجنة.
