وصول فتاة التجمع إلى المحكمة تزامنا مع أولى جلسات محاكمة سائق أوبر المتهم بمحاولة خطفها
وصلت منذ قليل نبيلة عوض، والمعروفة إعلاميًا بـ فتاة التجمع، إلى محكمة جنايات القاهرة، لحضور أولى جلسات محاكمة سائق أوبر المتهم والمدعو حسين بتهمة محاولة خطفها وهتك عرضها ومحاولة اغتصابها بنطاق منطقة مدينة نصر، خلال استقلالها السيارة معه.
التحقيقات في قضية فتاة التجمع
وانفرد القاهرة 24، بنشر نص التحقيقات في قضية فتاة التجمع، والمدعوة نبيلة عواد، ضحية سائق أوبر المتهم باختطافها، والتعدي الجنسي عليها، وتهديدها بالقتل، وإصابتها في يدها بأداة حادة خلال شهر مايو الماضي
وتابعت ضحية سائق أوبر: بعدين أنا قولتله أنت متضايق أو في حاجة أو محتاج الفلوس كاش نزلني هنا لأن أنا مش معايا فلوس كاش، وكان بيتجاهلني لما بكلمه وبعدين قال أنا خلاص بدأت الرحلة، وبعد كده مشي في الطريق، وأنا معرفش الطرق فلقيته ركن العربية على جنب الطريق، فأنا كان في وداني سماعات التليفون المحمول بسمع قرآن، فلما لقيته ركن العربية فشيلت سماعة منهم أشوف في ايه، لقيته بيقولي أنا ممكن أنزل أجيب مياه من شنطة العربية علشان عطشان أشرب، فقولتلوا اتفضل.
وأردفت: نزل وفتح باب الشنطة وبعدين اتأخر شوية، فحسيت إن حاجة غربية بتحصل، فقومت لميت الشنطة بتاعتي وبفتح باب العربية علشان أنزل، وبعدين بدأت أنزل رجلي من العربية لقيته جه وماسك في إيده سلاح حاد بيقولي ده كتر ويقولي اهدي اهدي، ويزعق علشان لو مش بطلتي صويت هقتلك.
وجاء في أقوال نبيلة فتاة التجمع: أنا ساعتها قولتله اقتلني بس مش هتعمل معايا حاجة لأنه شد هدومي وكان عمال يمسكني، وأنا ساعتها كنت بدافع عن نفسي وماسكة بإيدي السلاح اللي في إيده وكان بإيده الثانية عمال يمسكني من جسمي، ويضربني على وشي ورأسي ويشدني من شعري، وأنا أصوت وأقوله حرام عليك أنا عندي عيال قعد يشتمني بيقولي اهدي، لحد ما حاولت أفتح باب العربية اللي ورايا، وأزحلق نفسي بره باب العربية اللي ناحية الطريق.
الاعترافات الكاملة لـ سائق أوبر المتهم
وقال سائق أوبر المتهم: أنا أعمل سائق وأقيم بمركز أبشواى بمحافظة الفيوم، ولي محل إقامة آخر بالمقطم محافظة القاهرة، واللي حصل إن أنا شغال عند المهندس ش.ز، سواق بالعربية اللي أنا مأجرها من الفيوم عنده في كمبوند بالتجمع الخامس، وبعد ما بخلص شغل بشغل أبلكيشن أوبر عشان أعمل كام رحلة أجيب مصاريف البنزين بتاع العربية، علشان أوفر فلوس المرتب اللي باخده عشان بصرف على نفسي وأسرتي.
وتابع المتهم باختطاف وهتك عرض فتاة التجمع في اعترافاته: وأنا في الطريق قلت لها الحساب بتاع الرحلة ظاهر إنه فيزا وطلبت منها إن تحولها ليا كاش أو على البرنامج بتاع إنستا باي، فقالت الرحلة بكام وأخدت التليفون مني تسجل الرحلة على برنامج أوبر حاجة اسمها العميل، وبعدها لقيتها بتقول لا أقف على جنب ونزلني فركنت فلقيتها كانت فاتحت الباب ونازلة، فقولتلها طيب هاتي التليفون بتاعي فلقيتها واخذاه ونازله فبطلت العربية وشديته من إيدها فقامت هي شداني من وداني اللي فيها السماعة اللي أنا بسمع بيها فكنت أخدت منها التليفون وشديت منها السماعة فاتقطعت في إيدي أنا وهي، وبعد كده نزلت وسابت الباب مفتوح.
