أورتيجا عن غنائه مع أوكا مجددًا في حفل بعد انفصالهما منذ 4 سنوات: مفيش خلافات ونحضر لعمل يجمعنا قريبًا
كشف مطرب المهرجانات أورتيجا، عن سبب ظهوره الأخير مع المطرب أوكا في حفل غنائي، وذلك بعد انفصالهما لمدة 4 سنوات، موضحًا موقفهما من تعاونهما سويا في مشروع فني جديد.
وقال أورتيجا في تصريح خاص لـ القاهرة 24: أنا وأوكا مفيش بينا خلافات وبنقعد كل يوم مع بعض وبنتكلم وإحنا مش متخانقين وعلى مدار الأربع سنين اللي فاتوا كنا مع بعض، والاختلافات كانت في الأفكار فقط ودي حاجات عادية.
وعن عودتهما معًا في عمل قريبًا، أوضح أورتيجا: هنكون مع بعض في عمل قريبًا ولكن منتظرين بس تكون حاجة حلوة لأننا حرصين أننا نقدم حاجة مختلفة وإحنا أخوات، وكل اللي بيتقال على مشاكل مفيش الكلام ده وهو أخويا.
أورتيجا يتحدث عن بدايته مع أوكا
وفي سياق آخر، تحدث أورتيجا خلال لقائه مع القاهرة 24، عن بدايته مع المطرب أوكا في وقت سابق، وقال: إحنا كنا حالة مختلفة، وفي البداية كان الجمهور بيقول لينا أنتوا فترة وهتنتهي، بس أنا وأوكا كنا بنفهم في الراب أوي، من حيث شكله عامل إزاي، وقدرنا نجمع ده في المهرجانات، والناس اتقبلته.
وأضاف أورتيجا: دي كانت حاجة جديدة طالعة على المجتمع، وعيالنا بيسمعوا ناس بتسف وإحنا مكنش ده هدفنا ولا أن في ناس تسف ولا حاجه، وكنا بنعمل مزيكا أنها تطلع كده كل فترة حاجه عاديه يعني.
