شمس البارودي عن نجلها الراحل عبد الله: خرج من قصة حب فاشلة.. وجهز شقته قبل وفاته
كشفت الفنانة المعتزلة شمس البارودي، أسرارًا لأول مرة عن نجلها الراحل عبد الله، وذلك مع اقتراب الذكرى الأولى لوفاته، حيث رحل عن عالمنا يوم 30 يوليو العام الماضي غرقًا.
وقالت شمس البارودي، في تصريح خاص لـ القاهرة 24: أبوه بيقعد يبكي كأن لسه الحدث حاصل، والحمد لله البكاء ده رحمة من الله، وهو عريس في الجنة وكان خارج من قصة حب فاشلة وسابني أنا أختار له، وفرش شقته معايا قبل ما يموت، الحمد لله كله بأمر الله.
وأوضحت شمس البارودي، عن منزلهم بالساحل الشمالي، الذي قطن به نجلها قبل وفاته: الفيلا دي عندنا من 30 سنة، وهو للأسف الشديد روحنا الخميس وقعدنا الجمعة والسبت حصل اللي حصل، من ساعتها المكان مقفول، حتى ابننا الكبير خدنا بيت على البحر الأحمر، وقعدنا عنده لمدة شهر بعد الوفاة وبعدنا عن البيت خالص، الفقد صعب بس خلاص ده أمر يخصنا إحنا ولو الناس مش حاسة بيه ربنا يتولاهم ويهدي الجميع.
شمس البارودي: روح ابني عبدالله بتتمتع بالحرمين
وتابعت شمس البارودي: اتعمل حاجات خير لعبد الله كتير، وبيتعمل الحمد لله من وقت وفاته، لكن مش هنقول عليها بس الحمد لله كل حاجة اتعملت وبزيادة عشان روحه تبقى مرتاحة، وبيجيلى وبييجي لـ أبوه الحمد لله، قلبي مرتاح الحمد لله، واتطمنت عليه وعلى مكانته بفضل من الله ونعمة.
وكشفت شمس البارودي، رغبة نجلها في أداء مناسك العمرة قبل وفاته، قائلة: ناس معرفهاش بتعمل ختمة قرآن لـ عبد الله، الحمد لله وهو حبيبي كان قبل وفاته بـ 5 أيام بيقول عايز أروح مكة، وإحنا بنروح هناك وبنعمل عمرة كتير، وأنا بقول روحه هناك وبيتمتع بالحرمين والله أعلم، كل غيب في يد الله وإحنا مؤمنين بقضاء الله ولكل أجل كتاب وكلنا رايحين مفيش حد قاعد، وإن شاء الله يكون لقائنا معاه في الجنة لأنه شهيد.
