شيرين عبد الوهاب هتنتهي لو الناس عرفت.. حسام حبيب يكشف لـ القاهرة 24 تفاصيل واقعة التعدي
اختص المطرب حسام حبيب، طليق الفنانة شيرين عبد الوهاب، موقع القاهرة 24، لـ كشف التفاصيل الكاملة لأزمة شيرين عبد الوهاب مع ابنتها هنا، مؤكدا أنه مصدوم من تصرف زوجته السابقة تجاه ابنتها، ونستعرض لكم خلال السطور التالية التفاصيل الكاملة للأزمة.
حسام حبيب يكشف تفاصيل أزمة شيرين عبد الوهاب في واقعة ضرب ابنتها هنا
وقال حسام حبيب في تصريحات خاصة لـ القاهرة 24: مكنتش أتخيل أبدًا إن خناقة أنا مش طرف فيها، خناقة بينها وبين بنتها، إنها تقول كدا، وأنا هطلب شهادة بنتها، وهي عاملة في بنتها حاجة لما الناس هتعرفها شيرين هتنتهي عند الناس، لأن اللي يهون عليه ضناه يهون عليه أي حد في الدنيا، ولما شفت المنظر ده كان لازم آجي وأشيل هنا من تحتها، ولازم أتصرف.
حسام حبيب: اللي شفته رعب.. وقلت لوالد هنا ابعدها عن شيرين
وتابع حسام حبيب: اللي مأثر فيا أكتر إني قولت لـ هنا روحي اتكلمي مع مامتك، وجبت الاتنين وقلتلها يا هنا دي مامتك ولازم تحترميها، وجبت شيرين وقلتلها دي بنتك وخلي كلامك بينكم وبين بعض، وطلعت لقيتها قفلت الباب بالمفتاح، والباب زجاج، وفضلت أخبط محدش بيفتح، لحد ما شفت منظر مش قادر أفتكره، فكسرت الباب ودخلت أخدت البنت، وكلمت باباها وقلتله لازم تيجي تاخدها، وتيجي بنفسك مش هبعتها مع حد، وأرجوك ابعدها عن الشخصية دي.
حسام حبيب: بحكي التفاصيل دي وأنا متقطع.. وشيرين عورت نفسها ونزلت عملت محضر
وأضاف حسام حبيب: أنا بقول الكلام ده وأنا متقطع، وأنا بحب شيرين جدا بس دا أمر واقع واللي شفته كان مرعب، واللي حصل فيا دا في كفة واللي شوفته النهادره في كفة تانية، وأنا مقدرش أقول اللي شوفته، لأني مش مفوض من هنا ولا من والدها إني أقول حاجة، بس أقسم بالله اللي شفته مرعب ولا في الأفلام، وطبعا كل الألفاظ اللي في الدنيا وحاجة مايصدقهاش عقل.
واستكمل حسام حبيب لـ القاهرة 24: هنا بنت شيرين قالت إن حسام معمليش حاجة ولا لماما، قالت اللي عمله إنه شالني من تحت إيديها، وقالت إن ماما هي اللي عورت نفسها عشان تنزل تعمل اللي هي عملته ده حاجة عمرها ما جت في بالي، هي قالتلي زمان لما باباها كان بيتخانق مع حد بيعور نفسه ويروح يعمل محضر في القسم، وكنت مفكرها بتهزر، دي مش حاجة وراثة بس دا سلوك، ودا سلوك غلط، وأنا عاشرت شيرين كتير بس هي لما بتتعصب بتأذي نفسها، وهي بتقول كدا لازم أضر نفسي عشان أعمل مشكلة أجبرك أنك تمشي أو متكليمهاش تاني.
حسام حبيب: شيرين كانت هتطرد بنتها.. وبدأت أكره نفسي بسبب حبي لـ شيرين
واختتم حسام حبيب: شيرين قالتلي نزلها حالا في الشارع قلتلها مش هنزلها، قالتلي هنزلها وهكلم أبوها وأقوله كمان ماياخدهاش، قلتلها ايه ده على جثتي، وفعلا عملت اللي أنا عايزه وكلمت أبوها لحد ما جه خدها، وقلتله نصيحة مني ابعدها عنها، لأن الموضوع فيه أذى بجد مبقاش تهريج، وشيرين غالية جدا عليا، وأنا بتقطع وزعلان من نفسي إني بقول الكلام ده، وكفاية مثالية.
