الذكرى الـ7 لملحمة البرث.. أرملة الشهيد أحمد المنسي عبر القاهرة 24: صحيت على مظاهرة حب.. وإحنا عايشين دلوقت وهو معانا
تحل اليوم الذكرى السابعة لملحمة كمين البرث، التي وقعت في 7 يوليو 2017، والتي استشهد فيها البطل عقيد أركان حرب أحمد منسي، قائد الكتيبة 103 صاعقة المتمركزة بمدينة العريش في شمال سيناء، واشتهر بقيادته عدة حملات لتنفيذ القانون، بهدف القضاء على التنظيمات الإرهابية في شمال سيناء.
أرملة الشهيد أحمد منسي توجه له رسالة
وجهت منار سليم أرملة الشهيد أحمد منسي، رسالة له عبر القاهرة 24، في الذكرى السابعة لاستشهاده، قائلة: صحيت النهاردة على مظاهرة حب على وسائل التواصل الاجتماعي، وتعازي من الناس والشعب المصري الأصيل، كإن الاستشهاد النهاردة، حلو إن الناس فاكرة أحمد وزمايله شهداء مصر اللي دافعوا عن الوطن بدمهم وروحهم، وبوجه شكري للشعب المصري كله وقيادات الدولة والحكومة المصرية.
وأضافت منار سليم أرملة الشهيد أحمد منسي، في تصريحات خاصة لـ القاهرة 24، بعد مرور 7 سنوات على استشهاد زوجها: هو الوقت بس اللي بيعدي، لكن إحنا عايشين ومعانا أحمد ومش مصدقين إنه فات الوقت دا كله، وبنقضي الأيام اللي علينا لحد ما نجتمع بيه، وربنا أراد إن الأيام دي نعيشها من غيره، وكل ما أنتظره إننا نجتمع تاني كأسرة.
وأضافت: فوجئت النهاردة إن الأولاد كبروا، وحمزة كتب له: 7 سنين يا بابا وإنت مش معانا.. وحشتنا، وعاليا كمان كبرت كان عندها 4 سنين، وما كانتش فاهمة يعني إيه موت ويعني إيه باباها مات، عاليا النهاردة حاطة صورته وكاتبة له وحشتني أوي يا بابا.
واستكملت أرملة الشهيد أحمد منسي: أنا ذهلت.. 7 سنوات حياتي بتتغير، حياتي كلها بتتحول، وكل حاجة بعد مش زي قبل، ولا عمرها هاترجع زي قبل، وسبحان مغير الأحوال، الحمد لله على كل شيء، وما زلنا النهاردة يا أحمد عايشين بتضحياتك وروح الفخر والعزة اللي إنت زرعتها وقدمتها لينا.. عايشين في خيرك واللي إنت قدمته يخلينا كلنا في حتة تانية، كلنا عايشين على أمل اللقاء، وربنا دايما ينصر مصر وتعدي كل المراحل الصعبة اللي بتمر بيها، وينصر شعبها وقيادتها وجيشها.
