بعد أشهر من رحيله.. أرملة المخرج أحمد البدري: بعد وفاتك الناس اللي ساعدتهم مبيترحموش عليك
أعربت أرملة المخرج الراحل أحمد البدري عن استيائها، من تجاهل البعض لزوجها، حيث أشارت إلى أن زوجها كان دائمًا يساند الكثير في مشوارهم الفني، ولكن بعد وفاته لم يلق حتى الدعوات منهم.
وكتبت أرملة الراحل منشورًا، عبر حسابه الرسمي بموقع التواصل الاجتماعي فيسبوك، قالت فيه: الله يرحمك يا بدريكا ويسامحك ويغفر لك، ارتحت يا حبيبى من الناس اللى كانت عشرة عمرك، وكنت قبل ما تدخل أي شغل بترشحهم كمساعدين إخراج ليك أو تصوير أو ديكور، كانوا عاملين فيها حبايبك.
تصريحات أرملة المخرج أحمد البدري
وتابعت أرملة البدري: من ساعة ما روحت عند ربنا وأنا كل يوم بكتبلك بوست أدعيلك فيه، وأطلب من حبايبك يدعوا لك، لكن للأسف ملقتش ولا اسم واحد فيهم بيترحم عليك، أو بيعمل لايك أو حزين، كنت فاكرة إن مفيش حد فيهم بيدخل فيسبوك بس للأسف هما ناس نشيطة جدًا على فيسبوك، وبيدعوا ويباركوا وعاملين الواجب الصراحة مع الناس اللي عايشي ربنا يبارك في عمرهم.
وأضافت: أحب أقولكم إنها مش دايمة لحد وأنا مش مصدومة في حد من أول ما البدري سابني وأنا مبقتش أتصدم، وأحب أقولك يا بدريكا متزعلش منهم أنت عندك أصحاب كتييير أوى بيحبوك جدا وكل يوم بيدعولك دعوة صادقة من قلوبهم بيحبوك بجد ربنا يتقبل منهم دعائهم ليك ويكون في ميزان حسناتك يا غالى أنت فى مكان لأحسن بكتيييير عند الرحيم الرؤوف بعبادة وإن شاء الله نتقابل في الفردوس الأعلى يا حبيبي.
