أول تعليق من خريج تربية رياضية بعد انتشار فيديو مصادرة مشروعه: نفسي آكل عيش بدون بهدلة| خاص
خلال الساعات الماضية، تداول مستخدمو مواقع التواصل الاجتماعي فيديو مصادرة السلطات لعربة قهوة خاصة بشاب من طنطا، وبعدها استغاث الشاب بالمسؤولين لإعادة العربة بسبب كونها مصدر رزقه الوحيد.
محمد طارق صاحب عربة القهوة يستغيث للحصول على ترخيص مشروعه
قال محمد طارق في تصريحات خاصة لـ القاهرة 24، احنا وافقين بناكل عيش ومش بنعمل حاجة غلط، وأنا خريج تربية رياضية، وروحت اشتغلت بشهادتي كذا مرة ومرتبي مش بعدي 2000 أو 3000 جنيه، ومرتب ده مش بيعيش حد دلوقتي.
وعن تفاصيل عمله على عربة القهوة قال: أنا ببيع قهوة ومشروبات ساخنة لأهالي المنطقة، وبقالي 4 سنين شغال على عربية القهوة، والحمد لله كل أهالي المنطقة عارفين أخلاقي، وعامل النظافة اللي ظهر في الفيديو، كان علطول بيشرب من العربية عندي، وأنا مكاني في شارع سعيد أمام كلية التجارة جامعة طنطا.
وأردف: أنا قدمت كذا مرة على ترخيص عربة القهوة، ومعرفتش أرخص مشروعي بسبب إنه لازم يكون معايا وسطة، وأنا قبل كده قدمت على ترخيص كشك، ومخدتش الموافقة وفيه ناس تاني حصلت على ترخيص الكشك، وأنا لو غلطان في حاجة أنا موافق إني أتعاقب، بس أنا كل اللي عاوزه إني آكل عيش، وأنا كان هدفي يكون ليا مشروع أكسب منه بدل شغلي بالشهادة.
واستغاث الشاب محمد طارق بالمسؤولين لحل مشكلة ترخيص العربة ليستطيع كسب رزقه قائلًا: نفسي آخد ترخيص لعربة القهوة، عشان أقف وأكل عيش من غير ما أتبهدل، أو العربية أو الكراسي تتصادر، وديه الخدمة الوحيدة اللي نفسي فيها.
