بلوجر ترفع دعوى قضائية ضد فيسبوك: كتب على البروفايل إني توفيت وسبب ذعر لعيلتي| خاص
رفعت البلوجر ساندرا فارس دعوى قضائية ضد فيس بوك، وذلك بعدما كتب أنها متوفاة على حسابها وسبب ذعرا لعائلتها.
فتاة ترفع دعوى قضائية ضد فيس بوك
قالت ساندرا فارس لـ القاهرة 24: اللي حصل بالظبط إن أنا كنت مسافرة يوم الجمعة وطيارتي اتأخرت 5 ساعات، قبل ما طائرتي تطلع بربع ساعة، فجأة لقيت نفسي برا الفيسبوك بتاعي، البروفايل بتاعي موثق بابلك فيجر مش اشتراك، المفروض في تواصل بيني وبين الدعم، وإن مش أي حد ينفع يقفل البروفايل بتاعي.
وأضافت: الطيارة بتاعتي قعدت 4 ساعات، وفيسبوك كتب إني متوفية، أهلي فضلوا قاعدين على أعصابهم، فاكرين إن بنتهم ميتة، وبقى بيجيلهم تليفونات تعزية، بابا متوفي وأمي هي اللي عايشة أمي كان هيجيلها حاجة بسبب الموضوع ده، وأول ما وصلت طمنتهم إن أنا كويسة.
وأضافت ساندرا: إللي عمل العملة دي زور شهادة وفاة وقدمها للفيسبوك، ولحد اللحظة ديه فيسبوك شايف إني ميتة، البروفايلات بتاعتي مقفولة وكان عليها حوالي ربع مليون متابع، أنا مليش دعوة مين اللي عمل كده بس أنا ليا دعوة الفيسبوك مش قادر ياخد بصوري، مش قادر يصدق إن أنا عايشة، هو سببي أزمة نفسية، لأن أنا في النهاية دلوقتي الناس فاكراه إن أنا مت الناس بتتكلم في أهلي تعزيهم.
وأشارت إلى أنها لا تعلم من قام بهذا الفعل، وفيسبوك وحده هو من يعلم، موضحة: الفيسبوك عبارة عن مافيا، وأنا رفعت قضية على فيسبوك، وناوية إن الموضوع يكبر، لأني حاليا متأذية نفسيا.
