أوفر دوز عطاء
من 5 سنين فاتت، وتحديدًا في سنة 2019، كانت السيدة الإنجليزية ديبرا تشونق الأرملة اللي عندها 67 سنة عايشة لوحدها في بيت كبير 4 أدوار في ضواحي لندن؛ بعد وفاة جوزها اللي كان ميسور الحال جدا وساب لها بعد وفاته مبلغ ضخم جدا غير البيت!..
ومع عدم وجود أطفال ولا قرايب قررت ديبرا إنها تخصص تركة جوزها في عمل الخير.. عملت إيه؟.. بقت تستضيف مشردين من الشوارع وتقعدهم عنها في البيت لفترات مش بسيطة، واكلين شاربين نايمين ببلاش!.. ومش بس مشردين.. كانت برضه بتستضيف أى حد من الجيران عنده مشكلة مع مراته أو واحدة متخانقة مع جوزها أو شاب غضبان من أهله لإنهم رفضوا يخلوه يسافر يصيف لوحده، وهكذا!.. أى شخص كان محتاج ملجأ له كام يوم كان بيت ديبرا أبوابه مفتوحة بكل ترحاب ومحبة!.. بالمناسبة.. كل اللي كانوا بيسكنوا عندها كانوا بيقعدوا فترات مؤقتة مش للأبد لإنهم مقدرين إن المكان اللي هما قاعدين فيه هو فترة معينة لغاية ما يحسنوا أوضاعهم، يعني بالبلدي كانوا ناس عندهم دم ومقدرين نعمة بيت الست ديبرا وبعد كام يوم من قعادهم فيه وتحسن نفسيتهم من معاملتها الطيبة بيقرروا يمشوا عشان يستغلوا الطاقة الإيجابية اللي أخدوها منها، وعشان كمان يسيبوا مكانهم لناس تانية جديدة محتاجين بالتالي عجلة الخير ماتقفش.. في بداية 2020 ومع ظهور وباء كورونا بدأت ديبرا تقلق على صحتها ونفسها لإن عندها في الأساس مشاكل صحية عويصة وغلسة، وطبعا كلنا فاكرين قائمة التحذيرات من التباعد الاجتماعي ولبس الكمامة والتطهير المستمر بالكحول والدايرة اللي كلنا كنا محبوسين فيها دي.
والحقيقة إن ديبرا كانت شايفة في حفاظها على صحتها واجب مهم، خصوصا إن فيه ناس بيبقوا مسؤولين منها وهي عايزة تسخر صحتها في خدمتهم.. يا ستي إنتي في إيه ولا في إيه!.. لأ لازم أحافظ على صحتي عشانهم.. تمام.. في أغسطس 2020 قابلت ديبرا في الكنيسة شابة إنجليزية اسمها جيما ميتشل عندها 36 سنة.. رغم فرق العمر الكبير بينهم لكن بسرعة وبسهولة وبسبب لُطف الاتنين بقوا الاتنين أصحاب مقربين.. بسبب القُرب ده عرفت ديبرا إن جيما عندها مشكلة كبيرة متعلقة بشقتها والمشكلة عبارة عن إن شقة جيما كانت محتاجة شغل كتير في توضيب السباكة والكهربا والنقاشة.. مش مهم ما هو كده كده جيما كانت محوشة مبلغ وشايلاه على جنب للمهمة دي.. سلمت المبلغ للمقاول.. فص ملح وداب!.. أخد الفلوس واختفى.. بلغت الشرطة اللي وعدوها بالبحث عنه وإن فلوسها هتيجي خلال أيام أو بالكتير أسابيع.. زى الفل.
راحت اتفقت مع مقاول تاني عشان يشتغل في الشقة وطلبت منه إنها تسلمه فلوسه بعد فترة من بداية الشغل.. بينها وبين نفسها هي كانت معتمدة إن الشرطة هتكون رجعت لها فلوسها من المقاول الأولاني.. لحد هنا تمام وبالفعل بدأ المقاول التاني يشتغل بس بعد فترة كان محتاج فلوس فطلب من جيما اللي صارحته بالحقيقة وإنها مش هتقدر تدفعله لإنها مش معاها.. المقاول التاني قال نعم نعم نعم!، طب آدي الشغلانة أهي!.. ساب الشقة وقرر إنه مايكملش شغل فيها.. هنا بقت "جيما" في ورطة وحكت لصديقتها الست ديبرا اللي استقبلت كلامها بحضن أم أكتر منه حضن صديقة وقالت لها بس كده!.. ولا تشيلي هم حاجة واعتبري فلوس تشطيب شقتك عندي.. سألتها جيما: إنتي بجد هتعملي كده!.. ردت ديبرا ببساطة مش إحنا أصدقاء ولا إيه!.. بس هطلب منك طلب.. التكلفة الإجمالية لتشطيب شقتك إنتي بتقول إنها حوالي 240 ألف دولار لإن البيت كبير والشغل اللي هيتعمل فيه كتير.. فأنا هستأذنك أديلك الفلوس جزء جزء عشان صرفي على المشردين اللي بيقيموا في البيت عندي ميتأثرش.. يعني مثلًا هديلك 20 ألف دولار للسباكة وبعدهم زيهم للكهرباء وبعدهم أكتر شوية وهكذا.. يعني كل بند بيتعمل في الشقة هدفعلك فلوسه مرة واحدة ولما يخلص تنفيذه هسلمك فلوس البند اللي بعده.
جيما طبعًا وافقت هي كانت لاقية أصلًا!.. التزمت ديبرا باللي وعدت بيه وفعلًا سلمت جيما أكتر من دفعة لكن حصل عندها أزمة مادية بسبب استيعابها لعدد كبير من المشردين في بداية سنة 2021 فطلبت من جيما إنها تصبر شوية وتوقف شغل في الشقة لحد ما الدنيا تتظبط وترجع تكمل لها باقي الفلوس.. هنا ثارت جيما اللي كانت شايفة إنها أحق من المشردين عشان تخلص شقتها.. يا بنت طب ما إنتي بالفعل خلصتي 70% من التشطيب وأنا مش عايزة منك غير شوية صبر لا يتجاوزوا الـ 4 شهور عشان أقدر أوفي مصاريف استضافة الناس عندي وبعدها هديلك فلوس عادي ولحد ما ده يحصل خليكي مقيمة عندي معززة مكرمة.. جيما رفضت وزمزأت، وردت بقلة ذوق وبجاجة على ديبرا والعلاقة بينهم اتوترت جدًا.
ديبرا بتاخد حقنة معينة كل شهر، واللي كانت متعودة تديها الحقنة دي هي جيما، بس طبعًا بعد الخلاف اللي حصل بينهم ماكانتش لاقية حد يديهالها ده غير إن البيت في الوقت الحالي ماكنش فيه حد خالص فأضطرت تتصل بيها وتطلب منها تيجي عشان تديها الحقنة.. جيما حست إن ديبرا بتجر ناعم وإنها لما تروح لها هتفاجئها وهتديها المبلغ.. راحت فعلًا وادتها الحقنة وسألتها مرة تانية عن باقي الفلوس فـ ديبرا ردت إن مفيش جديد وزي ما قولتلك كلها كام شهر وهيبقى معايا فلوس وهديلك اللي انتي عايزاه كله.. ثارت جيما ثورة عارمة لإنها ماخدتش اللي هي عايزاه وبسرعة افتكرت إن اللحظة دي مفيش حد موجود في البيت مع ديبرا فراحت ماسكة شاكوش ونازلة بيه على راس الست ديبرا المسكينة قتلتها!.. مش كده وبس دي كمان قطعت جثتها قطع صغيرة وشالتها في شنطة سفر كبيرة ونضفت البيت من كل نقطة دم وخرجت بالشنطة وهي بتجرها!.
ووصلت لمنطقة فيها غابات وحفرت حفرة كبيرة حطت فيها الشنطة وردمت عليها بالتراب والحجارة والصخور التقيلة عشان تخفي جريمتها.. لما زوار بيت الست ديبرا لاحظوا اختفاءها بلغوا الشرطة اللي جت وفحصت الكاميرات وشافوا بالفعل جيما وهي خارجة معاها الشنطة الكبيرة لكن ماشكوش فيها لإن المنظر ده معتاد سواء من "جيما أو غيرها خصوصًا إن ناس كتير بييجوا يباتوا عن ديبرا ومعظمهم بيكونوا شايلين شنط داخلين أو خارجين بيها.. فضل اختفاء ديبرا علامة استفهام عصية على الشرطة.. بعدها بكذا شهر كان فيه سائح أوروبي بيلف في غابات المنطقة وبيحفر بحثًا عن كنز بحسب خريطة معاه ووقف عند مكان فيه صخرة ضخمة فزاحها وبدأ يحفر ولقى الشنطة اللي فيها جثة ديبرا وطبعًا صعق من الصدمة وبلغ الشرطة اللي من لون الشنطة عرفوا وفهموا كل حاجة وتم القبض على جيما والحكم عليها في أكتوبر 2022 بالسجن المؤبد لمدة 34 سنة قابلة للتجديد.
أي زائد عن الحد بيتم تقديمه بدون حساب هيتشاف مع الوقت إنه حق مكتسب.. مش كل الناس بيبقى عندهم إحساس بظروف غيرهم اللي جايز تمنعهم في لحظات قليلة ونادرة من تقديم اللي اتعودوا يقدموه.. إحنا بشر وعادي إن درجات عطاءنا تتأثر وتقل شوية عن المعتاد في بعض الفترات لكن اللي مش عادي إن كل اللي تم تقديمه قبل كده يتنسي بمنتهى الخِسة والوضاعة ويتقال إني عمري ما قدمت أو يتم مطالبتي بالحد الأقصى من العطاء بشكل ثابت رغم إن ظروفي لا تسمح بيه حاليًا!.. كل ما هو متبادل مستمر، وكثرة العطاء بتعلم النمردة، ومواقفك الصعبة بتشوّفك حقيقة الأنانيين اللي مش عايزين منك غير حلوك وبس.
