أحمد سعد عن شقيقه عمرو: بينتقدني بشكل وحش أوي.. وبتسند عليه هو وجمهوري
تحدث الفنان أحمد سعد، عن شقيقه الفنان عمرو سعد، موضحًا أن الأخير يوجه له النقد بشكل لاذع، كما أنه من أكبر الداعمين له بجانب جمهوره.
وقال أحمد سعد، في حواره مع الإعلامي محمود سعد، في برنامجه Sold Out: عمرو بينتقدني بشكل وحش أوي، لما بسمعه أغنية بكون تعبان فيها أوي يقولي إيه القرف ده، بس الناس دي مهمة في الحياة، اللي بيقولولك كلام مفيهوش مشاعر، لأنك لو عايز تعرف قرار صح مليون % لازم يكون خالي من المشاعر، وعمرو من أهم الناس اللي أنا بتسند عليه دلوقتي هو وجمهوري.
سبب طلاق أحمد سعد وعلياء بسيوني
ومن ناحية أخرى، كشف أحمد سعد، سبب طلاقه من زوجته الرابعة علياء بسيوني، قائلًا: الشغل بدأ ياخد من حياتنا الأسرية، وهي شخص مجتهد ومحترم جدًا، وعملت أغنية بعتذرلك لـ بنتي والموضوع ده مكنش له علاقة أوي بالطلاق، بعتذرلها لأني مش معاها، قعدت مرة واتنين وألف أجاهد على حياتنا الشخصية والأسرية، ولو أنا أناني كنت كملت، لأن أنا الوحيد اللي مستفيد.
وتابع: أنا في الأول لما كنت بسمع منها كنت بقولها أنا عارف أنا بعمل إيه سيبيني أقرر، هي عندها صبر مهول وموجود عند كل الستات، وساعات بيكون استخدامه في النكد، أنا فيا حتة حلوة أني بعرف أختار الشخص اللي أسند عليه وأسلم له دماغي، أنا شايف إن هو اللي بيقرر كل حاجة ولكن أنا اللي مقرر إن هو يقرر لي، وشوفت نتيجة نجاحنا مع بعض.
