طارق العريان عن ولاد رزق 3: دعم هيئة الترفيه خدنا في مستوى تاني.. وصلاح الجهيني: العمل يحمل رسالة
تحدث المخرج طارق العريان، عن النجاح الكبير الذي حققه فيلمه ولاد رزق 3، والذي دخل قائمة أعلى إيرادات يومية في تاريخ السينما المصرية بعد طرحه بـ5 أيام فقط في السينمات بموسم عيد الأضحى.
وقال طارق العريان، خلال المؤتمر الصحفي المقام حاليًا بمدينة الرياض، على هامش العرض الخاص لـ ولاد رزق 3، بالسعودية: دعم هيئة الترفيه خدنا في مستوى تاني من الصناعة قدرنا نرتقي بالأكشن ونعمل أكشن مختلف مش بس بإمكانيات مادية ولكن نقدر نصور في أماكن ما ينفعش نصور فيها، خدنا وقتنا لأن الأكشن محتاج تكلفة ووقت لأنه مش حاجة ممكن نرتجلها لازم دراسة وتحضير وفي الآخر ممكن ما تظبطش فترجع تعيدها تاني ودي إمكانيات مش سهلة نعملها إلا بدعم هيئة الترفيه.
وتابع طارق العريان: الصناعة محتاجة تسويق، والتسويق اللي اتعمل لـ ولاد رزق مختلف وهو سبب من أسباب الإقبال الفظيع عليه.
مؤلف ولاد رزق 3: العمل يحمل رسالة
كما تحدث المؤلف صلاح الجهيني، عن تفاصيل فيلم ولاد رزق 3، قائلًا: من أول جزء إحنا كان عندنا قرار أن الفيلم بيتكلم عن 4 إخوات، والفيلم لقى إقبال عند الناس من الجزء الأول، والنجوم اللي معانا محترفين جدًا وعمر توزيع الأدوار ما عمل مشكلة بينهم.
وتابع صلاح الجهيني: أفلام ولاد رزق بتتكلم عن الأخوات والأسرة وازاي بيواجهوا مشاكلهم، مش بندعي أنه بيحمل رسالة كبيرة قد ما رسالته هي الترفيه وأن المتفرج يخرج مبسوط من الفيلم.
وأضاف: بالنسبة للذكاء الاصطناعي أنا من المتشائمين بموضوع الذكاء الاصطناعي وشايف أنه هياخد دور كبير من دور الفنانين في الزمن القريب وأقرب مما نتخيل وهي طبيعة الظروف وهنتأقلم معاها غصب عننا.
وواصل: بالنسبة لصناعة أفلام مشتركة بين مصر والسعودية، الشعبين فاهمين بعض وقريبين من بعض بشكل كبير ودخول السينما السعودية وظهورها هيخلي ده أسرع من الأول وقريب جدًا هنشوف أفلام مشتركة بشكل جيد مش بس كوميدية فقط ولكن اجتماعية ومختلفة.
منتج فيلم ولاد رزق يكشف كواليس الجزء الثالث
وكشف إستا موسى، منتج فيلم ولاد رزق 3، كواليس العمل، قائلًا: ولاد رزق واحد واتنين كانوا ناجحين وكانت عندنا فكرة وجود جزء ثالث من 2019 لكن جات كورونا في 2020 بطأت صناعة السينما، وفي 2023 قررنا نعمل التالت ودخلنا بقلب جامد.
سيد رجب يعلق على مشاركة نجوم الأهلي في الترويج لـ ولاد رزق 3
كما علق الفنان سيد رجب، على مشاركة نجوم النادي الأهلي، في الترويج لـ فيلم ولاد رزق 3، حيث أنه من المعروف تشجيعه لـ نادي الزمالك، قائلًا: أنا مش شايف تعارض بين فنان زملكاوي وأهلاوي وبين نكتة أو إفيه بيتعمل في الفيلم وأنا رافض التعصب بشكل عام، وأنا زملكاوي وبحب الأهلي وبعشقه وفي النهاية لو الأهلي لعب حلو بشجعه ولو لعب بره مصر بشجعه وأتمنى أن الأهلاوية يشجعوا الزمالك لو لعب حلو أو بره مصر.
