زوجة في دعوى خلع: بيحرجني أمام أهلي بسبب قفاه.. والزوج: بتتنمر عليا وبتضربني
أقامت سيدة دعوى خلع أمام قاضي محكمة الأسرة بزينهم تطالب التفرقة بينها وبين زوجها، بعد اعتداءه عليها بالضرب بسبب اعتراضها على مؤخرة عنق زوجها، الأمر الذي لم يتحمله الزوج واعتدى عليها بالضرب، وبعدها توجهت إلى المحكمة طالبة الخلع منه.
الزوجة: أداني علقة موت بسبب هزار أهلي معاه
وقفت الزوجة أمام قاضي محكمة الأسرة تحكي عن تعدي زوجها قائلة: مد إيده عليا يا فندم، وده كله علشان بهزر معاه وبقوله ده كل قفا، وأهلي بيهزروا معاه فضربني وأداني علقة موت، وأنا مش عايزة أكمل معاه، وأهلي بيتريقوا عليه ومحرجه منه بسبب قفاه.
وتدخل الزوج واستأذن القاضي في الحديث قائلا: سيادة القاضي أنا أعمل رسام وهذه هي خلقة الله لا اعتراض عليها، وأنا رضي بشكلي، ولما تقدمت لها من 5 سنين مكانش لها أي تعلق على شكلي، ولكن بعد ما تزوجنا بدأت في التريقة والتنمر عليا هي وأهلها، وأنا كنت مستحمل علشان بحبها وعلشان خاطر العيال.
الزوج: كل ما بنزور أهلها بيتريقوا عليا
وأضاف الزوج أمام القاضي: كل ما اروح عند أهلها يفضلوا يتنمروا عليا وأنا استحملت كتير، وباخد الموضوع بهزار وصدر رحب، ويفضلوا في الرايحة والجاية يتريقوا على شكل قفايا، ويستهزئوا بيا، وبدل ما تتكلم مع أهلها وتعترض تفضل تهزر معاهم وتضحك زيهم وده عصبني.
وواصل الزوج في الدعوى المقامة من زوجته بالخلع: 5 سنين حضرتك وأنا مستحمل تنمر وإهانة لحد ما كيلي طفح ومبقتش أستحمل ووصلت بيها الدرجة أنها تمد أيدها عليا وتضربني على قفايا وتقولي كل ده قفا، قلي سيادتك كان مطلوب مني أعمل أيه ومراتي بتضربني على قفايا، وبتتريق عليا هي وأهلها، وأنا تحملت علشان الأطفال وفي الآخر جاية رافعة دعوى خلع علشان ضربتها.
وقال دفاع الزوج، إنه تعرض لتنمر منذ 5 سنوات حتى وصل الأمر إلى أن الزوجة اعتدت على زوجها بالضرب على مؤخرة العنق مردفا: كل ما تشوفه تقوله ده قفا وتقوم ضارباه على قفاه وده اللى خلى زوجها يضربها، الأمر الذي جعلها تقيم دعوى خلع وتطالب التفرقة بينها وبين زوجها، وأخبرته أنها متنازلة عن حقوقها.
