زوجة في دعوى خلع: بخيل ومبيجبش لحمة ولا لبس العيد.. وبيقولي خليكي نباتية
أقامت سيدة دعوى خلع بمحكمة أسرة الهرم تطالب بالتفرقة بينها وبين زوجها، بعد رفضه أكثر من مرة وفي أجواء العيد شراء لحوم وملابس، وكلما طلبت منه شيء برر لها بأسباب غير منطقية.
زواج مروة اسم مستعار ومحمود دام 6 سنوات لكنها أصبحت لا تتحمل بخل زوجها وطريقته في كل ما تتمنى أو تشتهي من لحوم أو ملابس العيد، الأمر الذي جعلها تقيم دعوى خلع في محكمة الأسرة بالهرم.
وقفت الزوجة تشكو حالها للقاضي بعد سؤالها عن أسباب دعوى الخلع قائلة وهي تبكي: تعبت يا سيادة القاضي، 6 سنين عايشة في تحايل علشان يجبلي الحاجة وكل ما أطلب منه طلب يبررلي لدرجة إني مبقتش عايزة اعيش معاه ومش مستحملة اللي هو عامله فيا.
وأكملت مروة للقاضي وهو يستمع إليها في دعوى الخلع قائله: أنا كنت عايشة ملكة في بيت أبويا معززه مكرمة، اللي بطلبه بيجيلي وكنت مفكره زوجي هيعمل معايا أكتر من كده بس المفاجأة طلع بخيل ومش بياكل اللحمة علشان يوفر حتى مش بيرضى يجبها في المواسم.
وأكملت مروة حديثها ودخلت في نوبة بكاء ودموعها لم تتوقف: مستكتر علينا سيادتك يجيب لي ولبنته لبس العيد وكيلو ولا اتنين لحمة في موسمها ولم جيت اتناقش معاه قالي خليكي نباتية زيي، هو الجسم ده مش بيحتاج نسبة بروتين، تفتكر سيادتك بعد ده كل والعذاب اللي أنا عايشه فيه ينفع أكمل معاه، ده الرسول نهى عن البخل، وأمرنا بالصدقة وما بال إحنا أهل بيته وبيعمل معانا كده.
وتابعت الزوجة أمام قاضي محكمة الأسرة بالهرم: اتحملت 6 سنين وكملت علشان الطفلة اللي معانا بس أنا مش قادرة أعيش وعمري ما جيت عليه وهو بخيل مش معهوش، ومابقتش قادرة أكمل، ومش عايزه منه حاجه، أنا خايفه يجلي أنميا أنا ولا البت بسبب نقص البروتين، وأهلي مش مقصرين بس هو أنا متجوزة علشان أهلي يفضلوا يصرفوا عليا؟.
