الطفل المسكين
الطفل الأمريكي "جارنيت سبيرز" اتولد في سنة 2008 ومن بعد مرور شهرين بس من وجوده على وش الدنيا وهو بيفقد جزءا كبيرا من وزنه بشكل متواصل!.. والسبب؟.. إنه ماكنش بيقدر يُبقي الأكل في معدته.. هنا قررت الأم إنها تبدل في رضاعته بين حليب الثدي للحليب الصناعي، لكن الأمر فضل مستمر فقررت تروح لطبيب كبير..
بعد الفحوصات والتحاليل ظهر إن مستويات الصوديوم في دم "جارنيت" عالية جدًا، وهي دي السبب ورا التقيؤ المستمر منه!.. الطبيب إداله حقنة وريدية لإخراج الصوديوم من جسمه، وبشكل سريع بدأت تظهر بوادر الشفاء على الطفل.
مرت سنتين ورجع الأمر تاني بس بشكل أشرس.. مستويات الصوديوم في جسم الطفل بترتفع بشكل غريب، فيحس بألم قوي في معدته، مع نوبات صرع، وفي كل مرة تجري بيه أمه على المستشفى، وكل اللي بيقدر يعمله الأطباء إنهم يدوله حقنة ومحلول وريدي لتخفيف نسبة الصوديوم في الدم، فيتحسن فيرجع تاني لحياته الطبيعية ويرجع بعدها يتعب وهكذا!.
في سنة 2012 ولما بقى "جارنيت" عنده 4 سنين، سافر مع والدته من "الباما" لـ"نيويورك" بسبب ظروف شغلها، وسكنوا في عمارة سكنية مخصصة لكبار السن، بيسمحوا فيها للشباب إنهم يسكنوا معاهم بشرط إنهم يراعوهم.. وهو ده اللي كانت بتعمله والدة "جارنيت".. قعدت مع ابنها في شقة صغيرة في العمارة، وكانت بتشتغل في الصبح وبالليل بتشوف طلبات كبار السن في العمارة من غسيل أو تنظيم مواعيد أدوية وهكذا..
سكان العمارة وخصوصًا إنهم من كبار السن، حبوا "جارنيت" جدًا، وكلهم كانوا متعاطفين معاه لما بتجيله النوبة الصحية كل كام أسبوع.. لحد ما في يوم 17 يناير 2014، ولما وصل عمر "جارنيت" لـ 6 سنين أصيب بنفس النوبة، بس بدرجة أعلى من كل الدرجات اللي فاتت، فجريت بيه والدته على المستشفى، وهناك أصيب برضه بنوبة صرع عنيفة، فقرر الأطباء إنهم يحجزوه في المستشفى.
بعد ما أخد الحقن اللي متعود ياخدها، اتحسنت حالته في اليومين التاليين، لدرجة إنهم كتبوله أمر بالخروج من المستشفى بالفعل.. لكن وقبل خروجه بكام ساعة، رجعت أعراض المرض تاني، ومستويات الصوديوم ارتفعت بشكل زايد عن المعتاد، لكن للأسف المرة دي بالذات مانجحتش المحاليل والحقن في خفض الصوديوم بشكل سريع، لدرجة إن دماغ "جارنيت" ورمت ورما ضخما وانتهى الأمر بوفاته!..
الأمر كان صادم وكان بينذر باحتمال تكراره مع أطفال تانيين يفقدوا حياتهم بسبب مرض غامض زى ما حصل مع "جارنيت"، عشان كده الأطباء بعد وفاته صمموا يعرفوا هو فيه إيه!.. أول تفصيلة وقفوا عندها هي إزاى جسم الطفل ده بيبقى فيه الكمية الرهيبة دي من الصوديوم، خصوصًا إن الصوديوم بيدخل لجسم الإنسان من بره ومش بيتم صنعه جواه!.
مليون% الولد كان بياخد الصوديوم من مصدر خارجي!.. بس إيه هو!.. خرجوا كاميرات المراقبة عشان يشوفوا الولد كان بيعمل إيه في الفترة اللي بعد ما بقى كويس مباشرة، قبل ما يتعب التعب الأخير!.. لقوا إن والدته أخدته ودخلت بيه الحمام ومعاها في إيديها كوباية بيضا!.. وبعد ثواني خرجوا من الحمام ونيمت الولد على سريره، وبعدها حصلت النوبة اللي بعدها اتوفى!.
الأطباء بلغوا الشرطة اللي فتحت تحقيق موسع مع والدة "جارنيت" وفتشوا بيتها حتة حتة، واكتشفوا إن ملح الطعام موجود في كل شبر في البيت تقريبًا، لدرجة إنهم لقوا محلول ملح بيعادل تركيزه 70 علبة ملح، محطوط في حقنة في أوضة "جارنيت" في البيت!.. ضيف على كده كمان إن لما الولد دماغه ورمت وقبل ما يموت بدقايق كانت والدته صورته وحطت صورته على فيسبوك!.. طب يا ستي إنتي في إيه ولا في إيه!.
هنا اكتشفت الشرطة تفاصيل القصة كلها!.. إيه الحكاية؟.. الموضوع وما فيه إن السيدة "لاسي" والدة "جارنيت" كانت هي اللي بتسمم طفلها من وقت ولادته ولحد وفاته، لإنها حبت الاهتمام اللي بتحصل عليه من الناس بسبب مرض ابنها!.. بمراجعة ملفها الطبي النفسي، فوجئوا إنها برضه من وهي طفلة كانت بتكذب عشان تحصل على الاهتمام.. تقول إن والدتها عيانة عشان ماتروحش المدرسة.. تدعي المرض عشان تشوف نظرات المحبة في عيون اللي حواليها.. تقعد مع صديقاتها وتتكلم قدامهم بس عن المشاكل اللي مش حقيقية بالمناسبة لمجرد إنها تلاقي منهم دعم!.
سلسلة متتالية من الادعاء عشان لفت الانتباه والحصول على الاهتمام حتى لو بالكذب.. في سنة 2015 تم الحكم عليها بالسجن لمدة 20 سنة، وده حكم مخفف بالمناسبة، وفي حيثيات الحكم كتب القاضي إن التوصيف الطبي لحالة "لاسي" إنها مصابة بـ "متلازمة مانشهاوزن باي بروكسي" أو "اضطراب المرض الافتعالي".
فيه ناس ولأسباب تخصهم، بيحبوا يعيشوا في دايرة المظلومية عشان ينالوا جزء من الاهتمام ولفت الانتباه اللي هما مش قادرين يحصلوا عليه في الطبيعي!.. عادي إنه يكذب لو ده هيبقى معناه إنه يبقى محط الأنظار.. مش مهم إنه يوقع غيره في بعضهم عشان مايفضلش غيره في الصورة.. طبيعي إنه يتمارض لمجرد إنه يحس بالاهتمام في عيون اللي حواليه.. يلبس مليون واحد في مليون حيطة عشان بس يبان إن هو الوحيد اللي لطيف وماتطلعش منه العيبة!.. يعلق بيه بنات الناس عشان يتشاور عليه إن هو ده اللي مقطع السمكة وديلها، ولما البنت تسيبه وتبعد عنه ورغم إن هو السبب، لكن يجري يلف على الكل يحكيلهم عن مدى ظلمها وقسوتها!.. هو اللي دايمًا صح، ومحسود، ومظلوم، ومثالي، وكامل وغيره كلهم سيئين.. حياة كاملة من الخداع والوهم كل ما بتوسع كل ما بتبلع صاحبها.. "ستيف ماربولي" بيقول: (عقلية الضحية ستجعلك ترقص مع الشيطان ثم تشتكي أنك في الجحيم).
