أحمد عز: عندي غيرة الخواجة وهما مش أحسن مننا.. وبنشتغل عشان نسعد الناس
تحدث الفنان أحمد عز، عن بعض خبراته الكثيرة في الأعمال التي يشارك بها، مشيرا إلى أن كثرة العمل تجعل الفنان يتعلم الكثير ويأخذ بعض التجارب من خلالها.
وأوضح أحمد عز أن موهبته ترجع لتعلمه من أساتذة كبار وأن شعور غيرة الخواجة يلاحقه دائمًا، كاشفًا أيضًا أن نجاح العمل يأتي بالمشاركة الجماعية وليس بوجود النجم الواحد داخل العمل.
وتحدث أحمد عز على هامش حضوره مؤتمر فيلم أولاد رزق قائلًا: الشغل الكتير بيعلم وكل سنة بتعلم وفرحتي بالعمل بتاخد 3 أو 4 أيام وخلاص لو رجعت لأيام ملاكي الإسكندرية، وعندي عقدة غيرة الخواجة ومش أحسن مني ومبقبلهاش وإحنا نقدر وأتربينا على أن الفيلم المصري فيلم عربي ونسعى لده دايمًا.
أحمد عز عن مشاهد الكباريه: بنشتغل علشان نسعد الناس
وعن مشاهد الكباريه بفيلم أولاد رزق في السعودية قال أحمد عز: عمر ما كان الغرض وإحنا ضيوف في بلد نقدم شكل تاني لبلدنا، إحنا بنقدم عالم للفيلم ده، وبنشتغل علشان نسعد الناس، ومصر والسعودية بلد واحد.
أحمد عز: ما بحبش أسمع كلمة أحسن ممثل
وواصل أحمد عز: أنا زملكاوي بس عايزين نموت التعصب الكروي ومبحبش اسمع كلمة أحسن ممثل والعمل الفني عمل جماعي أنا لا يمكن أنجح إلا في وسط جماعة كل ما هنقلل التعصب هنبدع.
وأضاف أحمد عز: بقلق لما بعمل إعلان أو تصوير مسلسل وعندي طمع لـ النجاح والقلق عندي طبع لأني بجري ورا البروفيشنال، واتطمنت لولاد رزق بسبب طارق العريان، والقلق سمة أي شخص عايز ينجح.
طارق العريان: بسبب التصوير قفلنا شوارع في السعودية
وفي السياق ذاته تحدث المخرج طارق العريان عن كواليس تصوير الفيلم قائلًا: بسبب التصوير قفلنا شوارع في السعودية لمدة 4 أيام بالليل بسبب تصوير ولاد رزق 3 وكل المعدات كانت موجودة على أعلى مستوى وطلباتنا كانت بتتحقق سريعا، وجعلنا فكرة العمل في أسبوعين، ودخلنا الفيلم وإحنا مش معانا الأسكريبت وروحنا نصور قبل ما النجوم يتعاقدوا ومكنتش مصدق إننا ممكن نسجل في الوقت ده.
أما عن ترويج أحمد الفيشاوي للجزء الثالث من العمل رغم عدم مشاركته تحدث طارق العريان: مببقاش فاهم هو قاصد أيه من كتابته.
