سمسار أعضاء على الدارك ويب.. القصة الكاملة لواقعة مقتل صغير شبرا الخيمة بعد إحالة المتهمين لمحكمة الجنايات
واقعة مقتل طفل شبرا الخيمة لسرقة أعضائه وبيعها على مواقع الـ دارك ويب تعود إلى الأذهان مرة أخرى، بعدما أمرت النيابة العامة بإحالة المتهمين بقتل طفل شبرا والتمثيل بجثمانه وعرض ذلك على المنصات الإلكترونية الخلفية لتحقيق الربح المادي، إلى محكمة الجنايات المختصة، لمعاقبتهم فيما نسب إليهم من وقائع القتل المقترن بالخطف والاشتراك فيه، وإحراز أسلحة بيضاء.
واقعة مقتل صغير شبرا الخيمة لسرقة أعضائه وبيعها
وكانت البداية حينما شهدت منطقة شبرا الخيمة التابعة لمحافظة القليوبية جريمة قتل بشعة بعدما عثر الأهالي على جثة طفل يدعى أحمد محمد سعيد يبلغ من العمر 15 سنة، مقتولًا داخل شقة سكنية.
من جانبها تمكنت الأجهزة الأمنية من القبض على المتهم الأول في الواقعة حال اختبائه بجوار مستشفى الدمرداش، والذي أرشد عن باقي المتهمين في الواقعة، وهم المتهم الثاني شخص يدعى على طالب مقيم بدولة الكويت بصفته المحرض والمتهم الثالث والد المتهم الثاني.
كما أرشد عن عامل ديليفري وهو من ساعده في جلب المواد المخدرة والأدوات التي استخدمها المتهم الأول في جريمته، والمتهم الخامس وهو سمسار أعضاء بشرية ويدعى أبو حمزة، كما أمرت جهات التحقيق في وقت سابق بإخلاء سبيل والد المتهم الثاني في القضية.
وكشفت النيابة العامة، في وقت سابق، تفاصيل العثور على صغير انتزعت أعضاؤه في كيس مجاور لجثته في شبرا الخيمة، بأن أحد الأشخاص ارتكب الجريمة، وبضبطه واستجوابه أقر بارتكابه إياها بطلب من مصري مقيم بدولة الكويت، كان قد تعرف إليه عبر أحد مواقع التواصل الاجتماعي الخاصة بتجارة الأعضاء البشرية.
وأسفرت التحريات عن معرفة المتهم المصري المقيم بالكويت، الذي استخدم في ارتكابها هاتفًا محمولًا مزودًا بشريحة اتصال يملكها والده، وبناء على تعليمات المستشار النائب العام اضطلعت إدارة التعاون الدولي بمكتب النائب العام بالاتصال بالجهات المختصة بدولة الكويت، والإنتربول الدولي، والتي أسفرت عن ضبط المتهم ووالده، وما بحوزتهما من أجهزة إلكترونية، حيث تم ترحيلهما إلى مصر.
وباشرت النيابة العامة استجوابهما وصولًا لأسباب ارتكاب الجريمة، وأقر المتهم الأول -الذي جاوز الخامسة عشر من عمره- أنه من أوعز لمرتكب الجريمة بارتكابها، على نحو ما ورد بإقراره، قاصدًا من ذلك الاحتفاظ بالمقاطع المرئية لواقعة قتل الطفل المجني عليه والتمثيل بجثمانه، وذلك حتى تسنح له فرصة بيعها ونشرها عبر المواقع الإلكترونية التي تبثها مقابل مبالغ مالية طائلة.
أقوال والد صغير شبرا الخيمة حول مقتل نجله
واستمعت جهات التحقيق إلى والد طفل شبرا عن تفاصيل الواقعة الذي قال: اللي حصل أن ابني المتوفى أحمد محمد قد تغيب وخرج من منزلي يوم 15 أبريل 2024، وبحثت عنه في كل الأماكن وقررت أروح وأعمل محضر بتغيبه في قسم ثان شبرا الخيمة، وبمراجعة كاميرات المراقبة شاهدت نجلي المتوفي بصحبة المدعو طارق اللي شغال قهوجي، وتتبعنا الكاميرات حتى وصلنا لآخر مكان مع بعض فيه وهو شقة، وشميت ريحة كريهة من داخل الشقة وفتحنا الباب فوجئت بابني مدبوح.
وتابع والد صغير شبرا أمام جهات التحقيق: أنا بتهم طارق القهوجي بقتل ابني هو كان مأجر شقة، بعد ما يخلص شغله في القهوة اللي في الشارع بيرجع ينام فيها، وإحنا وجدنا ابني مقتول فيها ومدبوح وصدره وبطنه مفتوحين.
أقوال مالك العقار محل ارتكاب جريمة مقتل صغير شبرا
بينما جاءت مالك العقار محل الجريمة، أن المتهم بعد ارتكابه الواقعة ترك المنزل، مؤكدا أنه شم رائحة كريهة من شباك الحمام الخاص بالشقة وتزامن ذلك مع بحث أهل الطفل عنه للعثور عليه، قائلًا: عندما اكتشفت الرائحة الكريهة استعنت بالأهالي وفتحنا الشقة ووجدنا الطفل مقتولا على سرير وكانت أحشائه داخل كيس بجواره، موضحًا أن رجال الأمن وصولوا على الفور وجرى نقل الجثة إلى المشرحة، مؤكدا أن أهلية الطفل الضحية ناس غلابة فقدوا طفلهم دون أي ذنب.
النص الكامل لاعترافات قاتل صغير شبرا الخيمة
وبمثول المتهم الأول أمام جهات التحقيقات، اعترف بارتكابه الواقعة بناءًا على تحريض من المتهم الثاني من أجل المال، وجاء نص الاعترافات الكاملة للمتهم: اللي حصل إني من 11 سنة سبت البيت واتمرمطت في الشوارع من مكان لمكان، ومكنتش لاقي حتة أقعد فيها، وفي شهر سبتمبر من العام 2023 اتعرفت على واحد اسمه محمد عزت وشهرته أبو حمزة، عن طريق صفحة على فيسبوك بتاعته اسمها سلمى، وهو سمسار أعضاء بشرية بيوفق المتبرعين والمرضى مقابل مبالغ مالية، فقالي إني ممكن أبيع كليتي مقابل 170 ألف جنيه، وبالفعل جابني بيته في شارع الحبيبي بشبرا الخيمة ثاني، ونزلني أشتغل في قهوة العديني في شهر أكتوبر، لحد ما عملت عملية استئصال الكلية اليسرى، وبعت كليتي مقابل المبلغ المذكور، أخدتهم من أهل المريض في كافيتريا المستشفى، وروحت.
وأضاف المتهم بقتل صغير شبرا الخيمة: في شهر يناير 2024، خالد العديني مشاني من الشغل عشان شديت معاه في الكلام عشان طريقته سيئة جدًا معايا، وقعدت في البيت اللي استأجرته في حارة البستان - شبرا الخيمة أول، وفرشته كويس بس الفلوس بدأت تخلص بعد ما بعت كليتي، فدخلت على صفحات فيسبوك بتاعت التبرع بالأعضاء ودونت بيانات المرضى والمتبرعين عشان أحاول أوفق بين الحالات، بس معرفتش عشان سكتها كانت صعبة، فأنا عملت منشور على الصفحات بصفحتي الشخصية عرضت فيه فص كبد من عندي ولقيت واحد اسمه علي خالد تواصل معايا على رسائل الخاص، وقالي إن فيه مشروع أحسن من التبرع، إني أجيب طفل من 7 إلى 18 سنة، وشرط يكون رفيع مش تخين، وآخد منه عينات تتباع بملايين.
وتابع قاتل صغير شبرا الخيمة: المرحوم أحمد صغير شبرا الخيمة كنت أعرفه من شغلي في قهوة العديني وترددي عليها كزبون بعد ما سبت الشغل فيها، كنت بديله شكولاتة وبعطف عليه، ومكنتش أعرف غيره، فبعت صورته لـ علي وقالي تمام ماشي، وقالي هنخدره وتاخده عندك الشقة تاخد العينات، وهيكلمني فيديو يشرح لي أعمل أيه عشان أخد العينات لما أطلع البيت، لأني مكنتش فاهم عينات أيه اللي عايزها غير إنها شوية دم عايزهم وخلاص.
وأضافت قاتل صغير شبرا الخيمة: وقبل التنفيذ بيوم بعتلي قائمة بالحاجات اللي محتاجينها، وكلمت واحد اسمه علي شغال عامل دليفري جنب قهوة العديني وبعتله القائمة قولت له أنا محتاجها من صيدلية عشان أخويا عيان، وكان فيها أدوية منومة وأمبولات وكانيولات وأنابيب وريدية وشاش وحاجات كتير تانية مش فاكرها، ورحت له أخدتهم من قدام الصيدلية مقابل 420 جنيه مش فاكر بالظبط، ويوم التنفيذ أخدت أقراص مهدئة كتير عشان متوترش ومترددش ورحت قعدت على القهوة.
وأردف: أنا عارف أحمد بينزل من بيته دائمًا متأخر على 10 بالليل يروح السايبر يلعب، وييجي القهوة يهزر مع الناس، فقعدت، وهو جالي قولت له أنا جايب لك هدية في البيت، هنروح مع بعض البيت أديها لك ونرجع تاني، وقولت أمشي في الحارة اللي في وش القهوة وأمشي لحد شارع رشدي، وقابلته هناك واتمشينا مع بعض لحد البيت، وجبنا علبتين عصير تفاح، وطحنت قرصين منوم في البيت وفضيت العصير في كوباية وقلبته وشربته لأحمد.
واستطرد قاتل صغير شبرا الخيمة: كل شوية علي اللي كان في الكويت يكلمني على الماسنجر يقول لي هيدوخ دلوقتي وصوره ولي وابعت لي الصورة، واديت أحمد الريموت قولت له هات كرتون، قالي لا أنا تمام، وبالفعل ابتدا يدوخ فحطيت له دواءين منومين في كوباية مية بالشرائط، وقلبت المياه بالأقراص وهوه كان دايخ خالص، فمسكت رأسه وشربته الكوباية، فنام تمامًا، وعلي كلمني فيديو وقفل الصورة بتاعته وكان شايف اللي أنا بعمله بس قال لي هات حبل اخنقه بيه عشان نسحب العينات، فجبت حزام وجيت أخنقه لقيت أحمد صحي فجأة ورجع تاني على ضهره فخنقته بالحزام ومتحركش خالص بعد كده ومات.
وأكمل: جردت أحمد المعروف إعلاميا بـ "صغير شبرا الخيمة" من ملابسه والشاب علي المقيم بالكويت قالي هات سرنجة وافتح أمبول واسحبه فيها، فجبت السرنجة وشديت السائل وسحبت الأمبول كله وركنتها، وجبت مشرط جراحي ومن عند الصدر ودوست ونزلت بالمشرط لحد السرة، وفتحت الجلد وقالي كل حاجة مطلعها ليها سعرها.
وأضاف قاتل صغير شبرا الخيمة: علي قالي هات سكينة حامية، فجبت ثلاثة اتنين صغيرين وواحدة كبيرة، وقالي افتح الجرح تاني من أوله بالسكينة، فسألني عندك شاكوش علشان تكسر بيه العضم، قولت له لا، قالي طب اضغط جامد بالسكينة عشان لو فيه عضم السكينة تجيبه وعملت كده، وبعد كده قالي دخل إيدك علشان تشد الأعضاء ومبقاش يقول عينات، فشديت الأمعاء جامد وكان فيه حاجات ماسكة فقطعتها بالسكينة وجبت كيس كبير حطيت فيه الأمعاء.
وواصل قاتل صغير شبرا الخيمة: علي قالي الأمعاء سعرها 2.5 مليون جنيه، وبعد كده قالي طلع لي الرئة بـ 3 ملايين جنيه قولت له مش هعرف أطلعها، فقالي هات السرنجة وأنزل في منطقة حساسة للمجني عليه وأحقن العضو بالأمبول اللي كنت مفضيه في السرنجة، وعملت كده، فقالي هات المشرط وافتح من عند القضيب ودوس كويس هتطلع الخصيتين، فدست وقطعت حاجات كانت ماسكة في الخصيتين بالمشرط وحطيتهم في كوباية وقالي دول بخمسة مليون، وقالي أطلع لفوق وقعدت أشد الرئة لحد ما طلعت وحطيتها على الكيس، قالي شيل دول على جنب وريح شوية، وقعدت ريحت 10 دقائق.
واستكمل قاتل صغير شبرا الخيمة: علي المتهم المقيم بالكويت قفل واتصل عليا تاني بعدها وقالي هات سرنجة جديدة واسحب من الأمبول واحقن في العين الشمال، وقالي افتح بالمشرط عند جفن العين اليمنى ودست طلعت باللي ماسك فيها وشديتها وطلعت في إيدي، وحطيتها مع الخصيتين، قالي ريح تاني، وفصلت 10 دقائق وكلمني تاني، قالي هات مياه وادلقها في البطن مكان الأمعاء، ومديت إيدي زي ما قالي وشديت القلب وكان صعب بس خرج في الآخر في أيدي وحطيته في الكيس.
وأردف المتهم: بعدها علي قالي أقلبه على بطنه وبالسكينة قالي افتح من فوق الفخذ بشوية لحد الكعب وعملت كده، وقالي هات حتة من العضم من الرجل قولت له مش هقدر فقالي أقطع من اللحم فقطعت وحطيته في الكيس ونفس الموضوع في الذراع الأيمن وخدت حتة من اللحم وحطيتها في الكيس، وقالي افتح بالسكينة من عند فتحة الشرج لحد نص الضهر، وفتحت بالسكينة، وأنا سبت كل حاجة ودخلت الأوضة اللي فيها البلكونة وقعدت رايح جي مش عارف أعمل إيه، فاتصل بيا فيديو كول تاني، قالي كان فيه مشاكل في الشبكة.
إحالة المتهمين في واقعة مقتل طفل شبرا الخيمة للمحاكمة
من جانبها أمرت النيابة العامة، بإحالة المتهمين بقتل طفل شبرا والتمثيل بجثمانه، وعرض ذلك على المنصات الإلكترونية الخلفية لتحقيق الربح المادي، إلى محكمة الجنايات المختصة، لمعاقبتهم فيما نسب إليهم من وقائع القتل المقترن بالخطف والاشتراك فيه، وإحراز أسلحة بيضاء.
