هل هناك تدخل من مسؤولين في الحكومة لـ صالح الأهلي والزمالك؟.. أحمد دياب يجيب
كشف النائب أحمد دياب رئيس رابطة الأندية المصرية المحترفة، عن حقيقة تدخل المسؤولين في الحكومة المصرية لـ إصدار قرارات لـ صالح الأهلي والزمالك.
تصريحات أحمد دياب
وقال أحمد دياب في تصريحات تليفزيونية: الكلام ده أنا سمعت عنه في السوشيال ميديا فقط، لكن على أرض الواقع فعلا مفيش الكلام ده.
وأضاف: أحيانا هتلاقي جمهور الأهلي بيقول الرابطة ضد الأهلي، وجمهور الزمالك في الناحية الأخرى أحيانا بيقول الرابطة جت على الزمالك، ومعنى كده إحنا بناخد القرار الصحيح.
وأكمل: إحنا مش في خناقة، إحنا منتخبين من الأندية وإحنا بنمثل الأندية كلها، وأمناء على تنظيم مسابقاتهم وحقوقهم.
واستكمل: طبيعي إن الجمهور يؤيد فريقه، ولكن طالما إحنا ماشيين بيتقال علينا مرة ضد أو مع، يبقى إحنا كده ماشيين صح.
وأكمل: لا يوجد أي تدخل من مسؤولين في مصر، وبشأن وزير الرياضة يتدخل فيما يخصه بشأن منظومة الكرة، لكن تدخل لصالح نادي ده محصلتش.
وأتم أحمد دياب تصريحاته قائلا: بشأن ملف عودة الجمهور، ده ملف دولة، ولازم أشكر القوات المسلحة ووزارة الداخلية، واشتغلنا بشكل جيد على ملف عودة الجمهور، ووضعنا لوائح لـ الجماهير، وبالتالي أي خروج عن النص من جانب الجماهير بيتم معاقبته بواسطة الكاميرات والفان أي دي الخاصة بـ كل مشجع، وخلال موسم أو اثنين سيتم العمل على ترقيم مقاعد المدرجات.
