في 10 نقاط.. ياسمين عز تكشف إتيكيت التعامل مع الطليق| فيديو
تناولت الإعلامية ياسمين عز في حلقة اليوم من برنامجها كلام الناس المذاع عبر شاشة قناة mbc مصر، أزمة الطلاق، وناقشت الإتيكيت المرتبط هذه المنابة، إذ قدمت 10خطوات للمطلقة للتعامل مع طليقها، كما وصفت حال كل من المطلق والمطلقة.
وقالت ياسمين عز: الطلاق موضوع كبير وفيه زوايا كتير، والست زمان كانت تطلق تبكي على الأطلال أربعين يوما، لكن دلوقتي الست تطلق تعمل شعرها هايلاتس وتحضر أول فرح يقابلها، وطبعًا مش كلهن البعض منهن.
وأضافت ياسمين عز: علاقات كتير تبدأ بالسرسعة وتنتهي بالبهدلة، يعني الزوج والزوجة يرققوا صوتهم ويتكلموا بهدوء ويقربوا من طبقة صوت النجمة الكبيرة ماجدة الصباحي في عزها، وبعد شوية كل واحد بيطلع قدرات صوت جبارة يقعد أحسن مغني أوبرا في بيته، وبتسمع في البيوت سيمفونيات بحيرة البجع، والعلاقات دي بتنتهي بالطلاق.
ووصفت حال المطلق والمطلقة، قائلة: المطلق كأنه خرج من تأبيدة ويهيم على وجهه ويعرف ويحب تاني ومفيش عليه أي لوم، لكن المطلقة كأنها طلقت الدنيا، وتمشي بمبدأ الطلاق فناء وانتهاء ومفيش هناء، ولو رجعت متأخر تبقى ماشية على حل شعرها ولو كلمت زميلها تبقى ارتكبت الخطايا السبع، وهي ممكن تكون في قمة الأدب بس انتي في مجتمع قاسي بنحاول نغيره، لربما يتغير أو يغير نظرته وحكمه عليكِ.
إتيكيت التعامل مع الطليق
وكشفت ياسمين عز إتيكيت تعامل الزوجة مع طليقها قائلة: في حاجة اسمها إتيكبت معاملة الطليق، وإوعي تفهميني غلط أنا بكلم المدام مش الآنسة، طالما اطلقتي تبقى اتجوزتي، بلاش الآنسات والقاصرات يعلقوا على كلامي ده.
وجاءت نصائح ياسمين عز للمطلقات في عشر نقاط كالآتي:
1- لو إنتي محجبة مينفعش تقابلي طليقك والقُصة طالعة من الطرحة لأنه مينفعش يشوف طرف صباعك.
2- إوعي تتهوري وتقصي شعرك أو تصبغيه، نفسيتك مش هتتغير لكن فتلة شعرك هتشيط وتتقصف.
3- ممنوع إرسال الرسائل الطويلة والمستفزة واللي كلها لوم وعتاب من يوم ما عرفك.
4- اسمه على التليفون يتغير، هو مش كتكوتك ولا أرنوبك ولا فرعونك سميه أبو العيال أو أبو شيماء.
5-ما تعمليش بلوك ولا تشيلي صورتك من الواتس آب ولا تحطي صورة حسبي الله ونعم الوكيل.
6- ممنوع الكلام عليه أو على أهله بسوء احتراما للعشرة، وممنوع التلقيح أو التلميح على السوشيال ميديا.
7- لو عندك أولاد ما توحشيش صورته قدامهم لإن فرض عليهم يبروه ويحترموه ويحبوه.
8- ما دام طليقك بيصرف على أولاده من حقه يشوفهم في أي وقت وبلاش تلوي دراعه.
9-ممنوع تقفي في طريقه لو عاوز يتجوز تاني ويعيش حياته.. عيشي حياتك وخليه يعيش.
10-ممنوع حفلات بعد الطلاق.. الطلاق مصيبة وفراق وخراب بيوت وأبغض الحلال.
