شيري عادل: اعتذرت عن جودر وانبهرت بـ كريم عبد العزيز في الحشاشين
حلت الفنانة شيري عادل، ضيفة على أحد البرامج الإذاعية، وتحدثت خلال اللقاء عن تفاصيل أعمالها الفنية، وأجدد أعمالها مسلسل الوصفة السحرية، والذي من المقرر عرضه خلال الفترة المقبلة.
أبرز تصريحات شيري عادل
- أي عمل بيبقى نازل بتوتر جدًا، ولكن بعد منافسة كبيرة في رمضان الناس بتبقى نوعًا ما شبعانة من الدراما، فببقى قلقانة وبدعي إن أكون مختلفة والمسلسل يكون مختلف.
- بيتر ميمي المخرج هو منتج مسلسل الوصفة السحرية، وإخراج خيري سالم، أنا مرتاحة معاهم أوي وعاملين ورق حلو أوي والعمل اجتماعي بيتكلم عن الجواز والعلاقات والحب، والجمهور هيعيش مع الشخصيات وهيحس إنه عايز يعرف إيه اللي هيحصل في الأحداث.
- شخصية دينا في مسلسل الوصفة السحرية، جديدة خالص عليا وعمري ما قدمت حاجة شبيهه.
- كنت هعمل دور شروق في مسلسل جودر، أيام ما كان 30 حلقة قبل ما يتقسم على جزأين، ولكن اعتذرت لأني كنت بصور الوصفة السحرية.
- عمر ما حصلت معايا إننا نغير الأحداث خلال التصوير بعد ما العرض اتعمل.
- مهم إني أكون موجودة مع الجمهور على السوشيال ميديا، ولكن أنا مش شاطرة في ده وساعات بنسى الموبايل.
- أنا معملتش أي تصريحات عن فيلم عادل مش عادل، وأنا اتبسطت جدًا بالتعاون مع أحمد الفيشاوي هو إنسان جميل وطيب وعلى طبيعته طول الوقت.
- لما دكتور بيتر ميمي، كلمني عن مسلسل الحشاشين كنت في أسعد اللحظات، خاصة أننا كنا حاسين أن المسلسل هيكسر الدنيا من قبل ما ينزل، واتبسطت إني ضيفة شرف في حلقة واحدة ولكن فيه عمق في الشخصية.
- كريم عبد العزيز، في مسلسل الحشاشين كان في أحسن حالاته وانبهرت بيه، ومشهدي معاه كان مؤثر بالنسبة ليا أوي.
