والدة المخرج محمد سامي تتحدث لأول مرة عن علاقتها بـ زوجة ابنها مي عمر وكيف ترقيهما من الحسد
تحدثت النائبة صبورة السيد عن ابنتها الفنانة الشابة ريم سامي وزوجها محمد المغازي بعد حفل زفافها مؤخرًا، وكذلك تحدثت عن زوجة ابنها مي عمر وكيف ترقيهما من الحسد.
والدة المخرج محمد سامي تتحدث لأول مرة عن علاقتها بـ زوجة ابنها مي عمر
وعن علاقتها بابنتها ريم سامي قالت: ريم كانت مالية علينا البيت وكانت دلوعة البيت وأخدت النصيب الأكبر من الدلع في البيت مع إنها مسؤولة، ومحمد سامي دلعها وكان بيحس إنها بنته مش أخته، وباباها بعد ما أتجوزت كل ما يكلمها يعيط لكن أنا متماسكة شوية ومفتقداها جدا لأنها طيبة وحنونة وهادية ونسمة في البيت، وهي وباباها قصة تانية وإحساسهم ببعض غريب.
كما تحدثت الفنانة ريم سامي خلال مداخلة هاتفية عن علاقتها بوالدتها، وقالت: علمتنا كل حاجة هي قدوة كبيرة لأي ست نفسي لما أكبر أبقى زيها هي ست قوية وحنينة وعندها شخصية مختلفة ساعات ببص ليها وأقول إزاي مجمعة الحاجات دي في شخص واحد، وحنينة على ولادها وعارفة مشاكلهم ونفسي لما أخلف أكون صاحبة لأولادي زي ما هي صاحبتنا.
ريم سامي: والدتي عمرها ما زعقت ليا
وأضافت ريم سامي: هي عمرها ما زعقت لي ودايمًا لما أعمل حاجة تكلمني براحة وتفهمني الصح والغلط براحة وتشجعني علشان أكون أحسن وعاوزانا كلنا ناجحين، وتاني يوم خلصت جامعة لقيتها بتصحيني الساعة 7 الصبح بتقولي يلا فيه شغل أنا معنديش بنات تقعد في البيت ونزلت اشتغلت معاها وعلمتني كل حاجة ومحدش ليه فضل عليا في حياتي قدها وهي ووالدي.
وكشفت ريم سامي نصيحة والدتها لها قبل الزواج: قالت لي متجيش تحكي لي حاجة لو اتخانقتوا عشان أنا ممكن أشيل منه لكن إنتي هتصالحيه عادي، ودايما تقول لي الست شاطرة لازم تبقى شاطرة في كل حاجة، في بيتها وشغلها ناجحة مع جوزها وأولادها وهي كده عرفت تنجح في كل حاجة.
ومن جانبها ردت، صبورة السيد ووجهت رسالتها لابنتها قائلة: ربنا يسعدكم إنتي جبتي ليا ابن جديد جميل ومحترم وطيب زيك وربنا يرزقكم بالذرية الصالحة ويارب كل أيامك هنا وسعادة.
مي عمر تتحدث عن علاقتها بحماتها
ومن جانبها، كشفت الفنانة مي عمر عن تفاصيل علاقتها بوالدة زوجها النائبة صبورة السيد، مؤكدة أنها تعتبرها بمثابة والدتها الثانية وتأخذ رأيها في أمور كثيرة بحياتها.
وقالت مي عمر: أنا معاملتي مع طنط بعيدة عن محمد، طنط بالنسبة لي هي أمي التانية وباخد رأيها في حاجات كتير، وهي مهتمة بحاجتي ومن أوائل الناس اللي بتبشرني بأي حاجة وباخد رأيها، وهي أم ناس كتير أوي، وبتعرف تحتوينا كلنا، ولو فيه عندي مشكلة بتقف معايا أنا، وبتقولي فيكي حاجات كتير مني، زي الكتمان وعدم التسرع.
مي عمر تتحدث عن الحسد
وبشأن خوفها من الحسد من حديث الناس على علاقتها بـ محمد سامي قالت مي عمر: بالعكس فيه ناس مبسوطة وبتقول كلام كويس وإيجابي، وأنا مبخافش من الحسد ومبركزش خالص مع الحاجات دي.
والدة محمد سامي تكشف صفات زوجة ابنها مي عمر
وبدورها تحدثت النائبة صبورة السيد عن أهم صفات الفنانة مي عمر كزوجة وأم وقالت: هي بنتي ومرات الغالي وأم الغاليين وعندها مؤهلات كتير أوي أنها تبقى أم أحلى أحفاد وأحلى حفيدات هي غالية وحنونة ومؤدبة وتستاهل اللي هيا فيه وأكتر.
وبشأن خوفها من الحسد على علاقة ابنها وزوجته قالت النائبة صبورة السيد: بقول الله خير حافظا وبنقرأ قرآن وبنقول يا رب، بس ليه الناس مبتحبش تشوف اتنين بيحبوا بعض، وعاوزين يشوفوا الناس بتاكل في بعضها، هل الناس بتحب المشاكل؟، كلنا بنحب هدوان السر وراحة البال وإحنا ارتبطنا بفنانين زمان، فاتن حمامة وشادية ومريم فخر الدين ولبنى عبد العزيز وكنا بنحب نشوف الرومانسيات والحب بتاعهم لكن دلوقتي بنستغرب أن إحنا نشوف زوجين حلوين ودول نموذج ويا ريت كل راجل يبقى بيهتم بمراته وهي تهتم بجوزها ويبقوا قدوة كويسة لعمار البيوت.
