إحدى ضحايا سلمى الغازولي: فضلت تدينا مواعيد وبعد كده قفلت تليفونها واختفت | خاص
كشفت التحقيقات في قضية سلمى الغازولي، البلوجر المتهمة في قضية نصب كبرى، عن تقدم عدد من الأشخاص ببلاغ رسمي، يتهمون سلمى.م.ع، وعدد من الأشخاص، بجمع مبالغ مالية منهم قرابة 14 مليون جنيه، وذلك بإيهامهم أنه مقابل شراء كوبونات خصم جيفت كارد التابع لشركة شي إن الخاصة بالملابس، نظير حصولهم على أرباح مالية من الكوبونات.
ضحايا سلمى الغازولى في التحقيقات
وينفرد القاهرة 24 نشر نص التحقيقات المجنى عليها ضحية سلمى الغازولى اللتى جاءت كالآتي:
وقالت يمنى محمد إحدى ضحايا سلمى الغازولي: اللي حصل إن أنا شغالة في مجال الملابس، وأنا بجيب شغل تبع شركة ملابس معروفة، اسمها شي أن عن طريق وسطاء مواقع التواصل الاجتماعي، وبتفق معاهم على كمية من كوبونات الخصم الخاصة بالشركة دى والمنتجات بتاعتها، وبيتم دفع مبلغ مالي مقابل الكوبونات دي، وبعد كدة أنا بشتغل بالكوبنات عن طريق استخدامها شخصيا، واللى حصل إننا بنتحصل على الحاجات دى والاتفاقات من خلال جروبات كبيرة على الفيس بوك، بيبقى أشخاصها معروفين وسابق التعامل معاهم من أشخاص كتير، وفي ثقة في التعامل ومنهم المشكو في حقها سلمى م..ع، واللي هي كانت صاحبة بيدج كبيرة على الفيس بوك، وتم التواصل معاها للاتفاق على الشغل.
وأضافت إحدى ضحايا سلمى الغازولي: وفى يوم 8 و9 يناير 2024، تم الاتفاق على شغل جديد وتحويل مبلغ 28 ألف جنيه، ولكن قعدنا فترة كبيرة ومفيش حاجة اتبعتت وبعد كدة حاولنا نتواصل معاها، وقالت عندها مشكلة وأن لسه أسبوع كمان وهتسلمنا الشغل، وبعد كدة منفذتش برده، وفضلت تدينا في مواعيد تانية، وبعدها كدة فوجئنا بأن تليفوناتها اتقفلت واختفت، فحاولنا إننا نوصلها بعد كدة جينا على أشمون لإننا عرفنا إنها من هنا وعملنا المحضر.
وواصلت المجنى عليها: التحويل تم 8 و9 يناير 2024 وبيتم التواصل معاها، وهي اللي بتبعت الحساب اللي بنحول عليه ومكنش فيه أي تعاملات أو معرفة غير من خلال الواقعة دي، وعلاقتنا كانت مجرد علاقة الاتفاق اللي تم من خلال وسائل التواصل الاجتماعي، والجروب بتاعهم على الواتس آب.
واستكملت المجني عليها: الموضوع تم عن طريق الاتفاق مع سلمى بما أنها هي رئيسة التيم، وبعد كدة هي بتعرفنا نبعت الفلوس على حساب مين جروب بتاعها، وبيتم التواصل مع حد من التيم بتاعها برده، وبيتم الاتفاق إننا ندفع مبلغ مالی مقابل إننا نحصل على كمية من الكوبونات لشركة شي أن الخاصة بالملابس، علشان نستخدمها لشخصنا أو أي حد من المقربين لينا.
وتابعت: إحنا حاولنا نتواصل معاها، وقالت إن عندها مشكلة والتسليم هيتأخر شوية، وبعد كدة فضلت تماطل في ميعاد التسليم لغاية أما جينا هنا عملنا المحضر، والمبلغ اللى دفعته كان 28 ألف جنيه، وحتى الآن ماستلمتش الكوبونات اللي أنا متفق عليها ولا رجعولي الفلوس اللي دفعتها.
وفي ذات السياق، قال المستشار أحمد سلامة محامي ضحايا سلمي الغزولي، إن جريمتي توظيف الأموال والنصب ثابتتين، من حيث ركنيهما المادي والمعنوي، حيث إنها نشرت على مواقع التواصل الاجتماعي، وإيهام الجمهور من شتي أنحاء الجمهورية بربح مستقبلي، وذلك بغرض جمع الأموال من أكبر فئة شعبية.
وأشار إلى أن المبالغ وصلت إلى ما يقرب من 200 مليون جنيه مصرى، إذ جمعتهم من أناس كسبوا أموالهم بعد عناء وشقاء لمدة أعوام وأعوام، ومن أناس باعوا كل ما يملكون واستدانوا من أجل السعي لربح يعيشون منه هم وأولادهم.
وأوضح أن المتهمة، لعبت على مشاعرهم واحتياجاتهم وأوهمتهم بالربح الكبير والسريع، فوقعوا ضحية لها وأعطوها كل ما يملكون، بل واستدانوا من أجل الربح الوهمي الذي أوهمتهم به سلمى الغزولي، والمجني عليهم يستغيثون بكل من له ضمير حي من أجل الوقوف بجانبهم حتى يتمكنوا من استرجاع اموالهم المسلوبة، والتي جمعوها بدمائهم وتدايونا من أجل الحصول عليها لآخرين، ويعانون من مطالبتهم لهم بتلك الأموال التي صارت في خبر كان.
