محامي الشيبي: اللاعب كرامته غالية عليه ورافض مساعي الصلح مع الشحات
أكد هاني بكري محامي اللاعب محمد الشيبي، لاعب فريق بيراميدز رفض كل مساعي الصلح بين لاعب السماوي ولاعب الأهلي حسين الشحات.
تصريحات محامي محمد الشيبي لاعب بيراميدز
وقال هاني بكري في تصريحات تليفزيونية: الشيبي تعرض لـ 3 مرات ظلم، الأول لما مجموعة من لاعبي الأهلي في مباراة السوبر المصري ضربوه؛ وتقاعس اتحاد الكرة بعد ما اللاعب قالهم أنا عاوز حقي، ومقدموش شكوته للجنة الانضباط.
وأضاف: تاني ظلم اتعرضله هو أنه اتسب واتشتم واتضرب قدام الملايين والمصريين والعرب والعالم كله اتفرج عليه وفي الآخر بهدلوه عشان لجأ للقضاء الإداري عشان ياخد حقه.
واستكمل هاني بكري تصريحاته: تالت ظلم هو امبارح وبعد ما يصدر حكم ضد الشحات بساعة، هناك حكم ضد الشيبي بإيقاف 6 مباريات.
وواصل: هنصعد الموضوع وهنلجأ للقنوات الشرعية، وإن وصل الأمر إني أدخل الفيفا عشان أجيب حق الشيبي هعمل كدة، واللاعب ماخطأش لما لجأ للقضاء الإداري، وهنستأنف ضد القرار عشان أجيب حق الشيبي عشان مينفعش يتوقف من جهة غير منوط بيها إصدار هذا القرار، وهي لجنة اتحاد الكرة، وسنتخذ كل الإجراءات القانونية لجلب حق الشيبي.
محامي الشيبي: من امتى بنشوف اتحاد الكرة بيصالح اتنين لاعيبة
وشدّد محامي الشيبي: مكنش فيه مساعي للصلح بين الشيبي والشحات ومن امتى بنشوف اتحاد الكرة بيدخل يصالح اتنين لاعيبة؟ أنا عمري ما شوفت اتحاد الكرة بيدخل يصالح بين 2 لعيبة.. ومحصلش تصالح بين الثنائي.
وأردف: أنا بتكلم بالقانون مش بقول كلام من وجهة نظري، وهتقدم بشكوى للجهات المختصة المنوط بيها.. ولو اتسأل أصغر موظف إداري في الفيفا، إن الشيبي خالف اللوائح هيقولك لأ.. لأن لجنة الانضباط هي اللي منوطة أنها تطلع عقوبة مش اتحاد الكرة، وعلامة استفهام على إنه يطلع عقوبة على اللاعب بمجرد صدور حكم ضد الشحات، والاتحاد يعلم أن هذا الاجراء غير قانوني.
واختتم هاني بكري تصريحاته، قائلًا: محمد الشيبي كرامته غالية عليه وحس أنه اتعرض لإهانة قدام مراته وبناته وأبناء شعبه في المغرب والعالم كله وشعر إنه اتهان بشكل غير طبيعي، ومُصِّر على إنه يأخذ كل حقوقه، ورافض أي مساعي صلح.
