مفيش حد هيخوفني.. عمر كمال يكشف حقيقة خلافه مع حسام حسن
تحدث عمر كمال عبد الواحد نجم النادي الأهلي عن أول انضمام له لمنتخب مصر في فترة كارلوس كيروش، والذي كان أحد الأسباب التي لعب بسببها في مركز الظهير الأيمن.
عمر كمال يكشف حقيقة خلافه مع حسام حسن
وبدأ عمر كمال تصريحاته بالحديث عن حسام حسن، المدير الفني لمنتخب مصر، قائلًا: حسام حسن قالي هجيبك وتلعب مكانك “جناح” وقالي جاهز قولتله جاهز قالي اطلع وغيّر قولتله بقالي كتير مبلعبش وملمستش كورة يا كابتن.. بس نزلت ولعبت ماتش ودي وبعد ربع ساعة نزل حسام حسن الملعب وقال لي اطلع غيّر وامشي.. وقال لـ إبراهيم حسن دا جاهز أكتر من الفرقة نفسها.. ودا كل اللي حصل.
وأوضح: لما طلعت في برامج تانية أنا بتكلم بطبيعتي ومفيش حد هيخوفني ولا هيقولي أقول حاجة غصب عني والكلام اتحرّف.. واتقال إني اتخانقت مع حسام حسن.. بس أنا تحت أمر المنتخب في أي وقت لأن الواحد أما يلبس تشيرت مصر بتبقا حاجة كبيرة.
وتابع: في خلافات كتير بتحصل في الكورة ودا وارد، لكن أنا أصلا في الأصل لا يوجد مشاكل بيني وبين حسام حسن.. والناس عملت موضوع من اللا موضوع وقبل كل ماتش بروحله أسلّم عليه - ولو أنا متضايق من حد مش بظهرله وشي اصلا -.. فـ هل قبل كل ماتش أما اسلّم عليه يبقا كده فيه مشكلة بيني وبينه؟.. ومفيش حد جابرني أقول كدة ومفيش حد يقدر يخليني أقول حاجة غير اللي أنا بقوله.
تصريحات عمر كمال عبد الواحد
وقال عمر كمال في تصريحات تليفزيونية: عندما انضممت لمنتخب مصر مع كيروش كنت ألعب جناح أيمن، وجاءت مكالمة لعبد الظاهر السقا من أحد أفراد الجهاز الفني للفراعنة وقالوا له نحن قادمون لنشاهد ظهير أيمن من فيوتشر.. وكان لدينا مباراة هامة بعدها فـ علي ماهر قال لي "هتلعب باك رايت قولتله ما إحنا عندنا باك رايت قالي ملكش دعوة هتلعب باك رايت في الماتش دا، ولعبت وأحرزت هدفًا رائعًا.. وبعدها انضممت للمنتخب الحمد لله وفضلت معهم حتى كأس الأمم الأخيرة.
وأشار: ضياء السيد كان بيقولي على السلبيات مش الإيجابيات عشان أحسّن من نفسي وكنت ببقى عامل حاجات كويسة، بس كان بيقولي السلبيات عشان أحسنّها.
وأكد: في يوم من الأيام كنت مشجع وعارف قيمة النادي الأهلي وبشكر الجمهور وحب الناس دا بيخلي الواحد يطلّع كل اللي عنده في الملعب.
وأوضح عمر كمال عبد الواحد: لما عقدي خلص مع المصري كنت لاعب حر.. بس ساعتها الأهلي فضّل التعاقد مع ميكيسوني.
وأكمل: أكرم توفيق ابني ولما اتصاب بالصليبي في المنتخب كان عنده إيمان مش طبيعي.. وكلمني وقالي خلي بالك وهتلعب وهتكسّر الدنيا.
وصرّح مازحًا: بعد مباراة إفريقيا لقيته خد رجل المباراة وقالي خدتها عشان أنت في الملعب.. ولما دخلت غرفة الملابس لقيت سيستم معين لازم نمشي عليه ودي اللي بتجيب البطولات والنجاحات.
وأكمل تصريحاته: كنت بتمنى أشارك في نهائي دوري أبطال إفريقيا.. وكأس العالم للأندية حلم لي وكل طموحي هو أني أذهب لأبعد حدّ مع الأهلي ونحقق مركز لم يتحقق من قبل ونفسي أذهب نهائي كأس العالم للأندية.
وأكد عمر كمال في تصريحاته: كولر يقول لي لو أنت مش واثق في نفسك.. فـ أنا واثق فيك والعب زي منتا بحريتك.. ومفيش حد هيضغطك.
واختتم: الدوري مش بيخرج من الأهلي دائمًا.. وعامل زي السلام عليكم.. والدوري عند الجمهور لا خلاف عليه.
