والد ضحية الخصوص: المتهم أنهى حياة ابني بسبب 300 جنيه| فيديو
شهدت منطقة الخصوص، واقعة مأساوية راح ضحيتها شاب لم يتجاوز الـ15 عاما، على يد شاب ثلاثيني بسبب طلب المتهم من المجني عليه أخذ مبلغ مالي منه بحجة دفع الإيجار.
تفاصيل مقتل طفل على يد عامل بالخصوص
التقى القاهرة 24 والد المجني عليه الذي كشف تفاصيل الواقعة،قائلًا: ابني عنده 13 سنة وخرج للشغل والمساعدة في مصاريف البيت مع المتهم، ويوم الواقعة المتهم قال لابني خد 300 جنيه دول اديهم لوالدتك عشان مصاريف البيت.
وأضاف والد الشاب: بعدها طلع ابني مع المتهم من الشغل حوالي الساعة 7 ونص وراحوا قعدوا على القهوة وبعدين المتهم قالي لابني أنا عايز الـ 300 أدفعهم إيجار السكن، فـ ابني رد عليه قاله مش هينفع أنا بشتغل عشان أساعد في مصاريف البيت، بعدها المتهم أخد ابني ومشيوا من شارع جنب القهوة كاميرات المراقبة كانت راصدة الواقعة، وكان ظاهر وراهم توك توك وبعدين اختفوا.
وتابع والد الشاب مصطفي: يوم اختفاء ابني، أنا روحت على بعد صلاة العشاء نمت، وبعدين على الساعة 3 بالليل لقيت أخوه بيصحيني بيقولي إن مصطفي مرجعش البيت، فـ قولتلوا تلاقيه سهران مع زمايله عشان كان صابح الجمعة وهو بيرجع ينام.
وأشار والد المجني عليه: تاني يوم استغربت إن ابني لسه مرجعش فتواصلت مع المتهم وسألته قالي إنهم طلعوا من الشغل وقعدوا على القهوة وبعدين ابني سابه ومشي، والمتهم فضل يدور معانا على ابني.
وأردف والد المجني: روحنا حررنا محضر في قسم الشرطة يفيد بتغيب ابني، وبعدين روحنا على مكان القهوة اللي المتهم وابني كانوا قاعدين عليها وفرغنا الكاميرات لقينا المتهم اتحرك من على القهوة برفقة ابني ومشيوا في أحد الشوارع الجانبية وبعدين اختفوا.
وأشار إلى أنه بمواجهة المتهم أمام جهات التحقيق اعترف بارتكاب الواقعة، وأنه اصطحب المجني عليه إلى أحد العقارات غير المأهولة بالسكان وأنهى حياته وفر هاربا من محل الواقعة.
واختتم: أن أحد السكان المقيمين بجوار العقار اشتم رائحة كريهة بعد مرور 3 أيام على الواقعة، فذهب إلى العقار كي يعلم مصدر الرائحة الكريهة فعثر على جثة المجني عليه، وأبلغ الشرطة التي حضرت إلى المكان وتعرفت على الجثة.
كانت البداية بتلقى غرفة عمليات النجدة بلاغًا من أحد الأشخاص يفيد العثور على جثة طفل داخل أحد الأمكان غير المأهولة بالخصوص.
بالانتقال والفحص تبين مصرع طفل يدعى مصطفى، يبلغ من العمر 13 عاما، علي يد آخر يدعى أحمد شاب ثلاثيني، بسبب قيام المتهم باستدارجه وقتله لسرقة 300 جنيه منه، وجرى نقل الجثة للمستشفى تحت تصرف الجهات المختصة بالتحقيق والتى أصدرت قرارها السابق.
