الأسعار الضعف والمعاملة سيئة.. سيدات تشكو من بدائل شركات التوصيل المقاطعة
اشتكت عدد من السيدات ممن لجأن إلى بدائل توصيل أخرى غير شركات المقاطعة، من غلاء أسعار الوسائل الجديدة التي تصل للضعف، بالإضافة إلى المعاملة السيئة.
سيدات تشكو من بدائل شركات التوصيل المقاطعة
وقالت سحر أمين لـ القاهرة 24: أنا لجأت لشركة اسمها وصليني بدل الشركات التانية، بعتلهم ماسيدج على الجروب الخاص بيهم على فيسبوك، إن شركة كريم بتوصل للمطار بـ180 وأنتوا بتوصلوا 270 لازم تقللوا الأسعار وتبقى محدودة علشان نقدر نستغنى عن الخدمة، مسحوا الماسيدج.
وتابعت: طبعا جروب زي كده مفيهوش أي مصداقية لو حصلت أي مشكلة هيمسحوها، ويمسحوا الأعضاء، وفي مغلاة بشكل كبير في الأسعار.
فيما قالت سيدة أخرى تدعى هبة: أنا سألت سؤال في الجروب الخاص بالشركة، وقلتلهم حصل إيه بتحذفوا الرسايل ليه، ده ممكن حد يفهمنا، طردوني من الجروب.
وأوضحت: في عندهم مشكلة لو ناس واثقين من نفسهم ميعملوش كده، بس البنات قالوا هيفضحوهم علي الجروبات، وواحده قالت بالجروب إنها هتقول لكل معارفها ميتعملوش معاكم، يعني هما اللي جابوه لنفسهم.
وأشارت غادة إلى استيائها من معاملة شركة وصليني لـ الزبائن: الناس بتقول رأيها عادى فى الأسعار، كل ما حد يقول رأيه فى منتهى الاحترام تلغى الكومنت وتخرج الناس من الجروب.
وأردفت: الحقيقة أنا كتبت رأيي وخرجت: مش من حق حضرتك تمسحى آراء العملاء.. إحنا على الجروب علشان كلنا نعرف مميزات وعيوب الخدمة، واعتقد لو كان الرأي لصالحكم ماكنتيش حذفتيه، وعموما هو ده رأي كذا حد من أصدقائي، إن أسعاركم مبالغ فيها، وأنا دخلت الجروب علشان أتأكد والحمد لله أنا اتأكدت، وإن كان على الأمان مابقاش فيه، ولا ستات ولا رجالة، دلوقتى بقت الميزة فى معاملة محترمة وأسعار معقولة، وياريت ماتنسيش تمسحي الكومنت بتاعي.
