هدى الإتربي: ربنا رزقني تفاصيل تخليني جميلة زي هند رستم وشادية.. واترعبت من باسم سمرة في العتاولة
حلت الفنانة هدى الإتربي، ضيفة على الإعلامية فاطمة مصطفى، في برنامجها الراديو بيضحك، المذاع عبر محطة راديو 9090، وتحدثت خلال اللقاء عن تفاصيل مشاركتها في مسلسل العتاولة، الذي عرض في السباق الرمضاني الماضي 2024، وحقق نجاحًا كبيرًا.
أبرز تصريحات هدى الإتربي في الراديو 9090
وقالت هدى الإتربي: السوشيال ميديا أثرت عليا أوي السنة دي، ولكن عرفتني قد إيه مسلسل العتاولة ناجح وقد إيه دوري كان له صدى، ولكني اتخضيت من هالة السوشيال ميديا.
وجاءت أبرز تصريحات هدى الإتربي الإذاعية كالتالي:
- الولاد اللي عندهم 17 و18 سنة كانوا بيكراشو عليا بسبب شخصية دينا في مسلسل العتاولة، وأحلى حاجة إن تأثير الشخصية في الجيل ده لأنهم صادقين أوي وحبهم طبيعي أوي غير لما راجل يشوف بنت حلوة.
- اللي انتقد لبس وميك آب شخصية دينا ظلم الشخصية، في الآخر مش أنا اللي بختار شكل الشخصية ودي مقومات الشخصية ولازم تبقى لافتة.
- أحمد السقا خ كبير وبيدي مساحة للنجوم الشباب أنهم يظهروا، وهو مش من النجوم اللي بتغير ولا بتمنع ظهور الشباب.
- فكرة البنت الجميلة مهمة أوي ومش موجودة عند كل الناس، وأنا بحمد ربنا أنه رزقني بالتفاصيل اللي تخليني جميلة زي هند رستم وشادية، والتمثيل بيتطور بالخبرة والمذاكرة.
- معنديش مشكلة أعمل دور دينا مليون مرة ولكن مع مخرجين مختلفين، لأن كل مخرج هيطلعها بشكل مختلف.
- أنا طول الوقت بعمل ورش تمثيل، هخلص اللي في مصر وبعدين أكمل في أمريكا.
- مفيش تجربة أنا مريت بيها في مجالنا أنا مستفدتش منها، ومندمتش على أي حاجة سواء تجربة وحشة أو حلوة، بالعكس ده بيساعد على نضوج الفنان.
- طارق لطفي ممثل عميق أوي، وفجأة بيرمي إفيه غير متوقع وهو لذيذ جدًا لازم يعمل كوميدي.
- باسم سمرة، بيبقى مركز قبل المشهد بشكل كبير، هو ممثل كاريزمته مرعبة، أنا كنت مرعوبة ومش عارفة هعمل إيه قدامه، ومكنش ينفع مستغلش فرصة إني قدام باسم سمرة.
