ياسمين عز تعلق على شائعات طلاق أحمد السقا: يا ريت نسيب الناس في حالها أنت مش المأذون
علقت الإعلامية ياسمين عز على شائعة طلاق الفنان أحمد السقا والإعلامية مها الصغير والتي انتشرت خلال الساعات الماضية.
تصريحات ياسمين عز عن أحمد السقا ومها الصغير
وقالت ياسمين عز في لقائها ببرنامج كلام الناس عبر شاشة mbc مصر: الكلام مش عن عمل جديد بيحضر له النجم أحمد السقا، ولكن الكلام كله عن أنه انفصل عن زوجته وكلاكيت للمرة الخمستلاف وطبعا مش صح ومش حقيقي.
وأضافت ياسمين عز: كل ده علشان بوست مها الصغير قالت فيه جملة أو أو خاطرة أو حكمة، ونصحت السيدات وقالت لا تستحملي الوجع ولا الإهانة لأن في الآخر عمرك هيضيع ومحدش هيشكرك والطلاق صعب لكن الأصعب منه العيش بروح مطفية، وهل هي علشان بتدي نصيحة للستات يبقى هي اطلقت؟ ولو أنا بتكلم عن الحوامل يبقى أنا حامل، لأ إحنا ممكن نتكلم عن الحوامل والمطلقات والآنسات، ليه كل حاجة نقولها تبقى ليها علاقة بينا؟
واستكملت ياسمين عز مستنكرة: ايه الأهمية في أن فلان اطلق، ليه نقول لما ممكن نسكت؟ ليه ننتاقش في الموضوع ده، والراجل طلع وقال يا جماعة دي كدبة أبريل وده مالوش أي أساس من الصحة وتقريبا بقى عنده صيغة ثابتة، أنت هتستفيد إيه لما يطلقوا؟ أنت مش المأذون، يا ريت نسيب الناس في حالها وأنا مش بهزر، أنا بعيطك نصيحة لله ومش أي حد يكتب حاجة ناخدها عليه أنتم كده هتحرموا الست تكتب حاجة.
ياسمين عز تهنئ الأهلي بفوزه على مازيمبي
على جانب آخر، هنأت ياسمين عز الأهلي بفوزه على مازيمبي وقالت: قلت لكم الأهلي هيكسب وبكره هاجي أقول لكم كسب، وقلت لكم الأهلي هيعبر مازيمبي بكل سهولة وإنسيابية وحرافية وده متحقق بثلاثية عبد المنعم بالرأسية وسام أبو علي بالمقصية وأكرم توفيق حطها في الزواية العكسية، وهو ده الأهلي والمتوقع هيصعد للنهائي للمرة الـ17 في تاريخه وللمرة الخامسة على التوالي في النهائي هيقابل الترجي ولو فاز عليه هيكون حقق بطولة دوري أبطال إفريفيا للمرة 12 يعني هيقفلهم دستة ودي أرقام قياسية متعودين عليها من فخر الكرة والصناعة، ولو تسمعوا كلامي وماتراجعوش ورايا هنعيش في سلام وهناء.
