سيد رجب يروي صعوبات مشواره الفني: كنت كومبارس وبقول كلمة في مشهد.. ولا أومن بالتقمص
تحدث الفنان سيد رجب عن مشوراه الفني وبدايته وذلك في ندوة تكريمه بمهرجان الإسكندرية الدولي للأفلام القصيرة.
وقال سيد رجب عن تكريمه من المهرجان: بحاول أكون عادي وأنا حاسس إني عادي فعلا، لكن متتصوروش أنا إد إيه مرعوب وخايف إني أطلع أقول وأتكلم.. ويارب أكون مفيد للجمهور.
وتحدث سيد رجب عن بدايته قائلًا: أنا ممثل واتعلمت التمثيل من المسرح، ومن خلال أحمد العطار اتعلمت إزاي أكون الشخصية ولكن مدرستي الأساسية فرقة الورشة، اللي اتعلمت منها فن الحكي وأعطتني فرصة إزاي أكون الشخصية.
وأضاف سيد رجب: اتعلمت على إيدين ناس نجوم في المسرح وحاولت أنفذ ده لما اشتغلت.. ودايما بتسئل إنت عملت الشخصية إزاي ومكنتش بعرف أقول إيه ولكن كان بفضل ربنا،وبكون الشخصية مع المخرج وبنتناقش في الشخصية سواء كانت شريرة أو طيبة وكل التفاصيل دي بنتكلم فيها وبنضيف ليها لحد ما نكون الشخصية وبنركز على كل التفاصيل وإزاي الشخصية بتتكلم وتمشي، وكنا بنعمل للمشي دراجات، وبحس إني مش بعمل نص ولكن بعمل حاجة نابعة مني.
وتابع: في الورشة اتعلمت يعني إيه تمثيل وكانوا الممثلين بيتريقوا عليا وكنت بعمل كومبارس وكنت ممكن أقول كلمة واحدة في المشهد وبعدين أدوني دور بطولة لمسرحية.
سيد رجب: أنا مش مع فكرة التقمص التام
واستكمل: أنا حضرت ورش كتير من وأنا صغير بره مصر كان بيجيبوا مدربين من برة علشان يدربونا، وكانت كل التدريبات دي بنطلع منها بعروض في المسرح، وكان في نشاط نطلع سواء ممثلين أومخرجين، ولذلك بقول في مواهب كتير جدا محتاجين نهتم بيهم وأنا اتساعدت لأني دخلت أماكن اتعلمت فيها، لكن الجيل ده محتاج الاهتمام به.
وتحدث سيد رجب عن تقمص الفنان للشخصية قائلًا: لازم يكون في نسبة وعي من الممثل بالجمهور بالدور بالجسم بالحركة.. ويسمع نفسه ويشوف جسمه وحركته وفين من الدور وتأثيره على نفسه علشان يوصله للجمهور.
وعن رأيه في التقمص قال: مش مع فكرة التقمص التام وبسمع ممثلين بيقولوا دي مدارس وطرق ويقولوا إنهم بيعيشوا مع الشخصية في البيت ولكن أنا أول ما بخلص تصوير خلاص وبعرف أروح للشخصية وأبعد عنها.
