اتعلمت كتير لما أبويا طردني.. قصة كفاح إسلام مع الرسم في الشارع ومترو الأنفاق
في قصة كفاح جديدة، سلط القاهرة 24 الضوء على حكاية إسلام عطية مع الرسم في الشارع ومترو الأنفاق، حيث حازت فيديوهاته الخاصة برسم الجمهور في المترو على إعجاب واسع.
قصة كفاح إسلام مع الرسم في الشارع ومترو الأنفاق
تحدث إسلام عطية عن تجربته مع رسم الناس في الشارع، قائلًا: أنا اسمي إسلام عطية خريج كلية حقوق، كان اهتمام الأكبر الفن التشكيلي، واشتغلت في القاهرة شغلانات مختلفة، وبدايتي في موضوع الرسم كان من سن صغير، وكان هناك دعم وتشيجع كبير من الأسرة لكن تحول ذلك التشجيع، عند تأثير الرسم على دراستي.
وتابع: وأنا في كلية الحقوق، كنت بعدي على كلية الفنون الجميلة وبعيط، وموضوع رسم الناس في الشارع بدأ في المترو، وكنت في البداية بتحرج أدي الرسمة للناس، لكن بعد كده اتشجعت، وكنت برسم اسكتشات بهدف الممارسة وأني أفرح الشخص اللي قدامي.
وأكمل: رسمت أكثر من 400 استكش، وساعتها قولت ليه ما أصورش الوقت اللي برسم فيه الناس في المترو، وأنا بقالي سنة كاملة بقعد أرسم اسكتشات للناس في المترو، وبدأت أوصل لجمهور مختلف من بلاد تانية، وبيطلبوا مني أرسمهم مقابل فلوس.
وبالنسبة لرحلته من المنيا إلى القاهرة، فقال: بدأت عندما طردني والدي من البيت، لأن الرسم أثر في دراستي، والحياة برة البيت مختلفة تماما، وأنا كنت عاوز اشتغل واجيب فلوس، وأنا اتبسطت إن أبويا طردني، لأن ده علمني كتير وخلاني أعتمد على نفسي واشتغل واجيب فلوس.
