هشام ماجد: مسلسل أشغال شقة نفس تيمة صباح الخير يا زوجتي العزيزة.. وضيوف الشرف هم الأبطال
كشف الفنان هشام ماجد، حقيقة سرقة مسلسل أشغال شقة من مسلسل فيلم صباح الخير يا زوجتي العزيزة، بجانب الحديث عن ضيوف شرف المسلسل، وسبب عدم ظهوره في وسائل الإعلام.
وقال هشام ماجد، في تصريحات تليفزيونية: مسلسل أشغال شقة هو نفس تيمة صباح الخير يا زوجتي العزيزة، لكن ده نسأل فيه خالد دياب وشيرين دياب، لأني لم أتدخل في الكتابة، وعادي أننا نعيد التيمة لكن فيه حاجات كتير كانت مختلفة.
وعن ضيوف شرف المسلسل، فعلق هشام ماجد، قائلا: ضيوف الشرف هم أبطال المسلسل ومبني عليهم القصة في الأساس، وانتصار ممثلة عظيمة وأنا سعيد بيها جدًا في رمضان السنادي، وكسرت الدنيا بمسلسلين، ودورها في أعلى نسبة مشاهدة، من أحلى الحلقات برضو بتاعت نهى عابدين لأن ضحكها في الجد بتاع نهى عابدين، وفي الكتابة مكانتش الحلقة دي عجباني، لكن خالد وشيرين اقنعوني، وحلقة ريم خوري برضو، لكني بحب اللعبة والرجل العناب، بس اللعبة له مكانة خاصة عندي، لأنه مأثر في الناس والأطفال متعلقة بيه.
وأكد هشام ماجد، أنهم بصدد التحضير لجزء جديد من مسلسل اللعبة، قائلًا: إن شاء الله فيه جزء جديد وبيتكتب دلوقتي، وهينزل السنادي، وموضوع مواعيد رمضان مش فارقة لأن المسلسل الحلو بيتشاف وبيتشهر، وأبرز مثال مسلسل كامل العدد نزل السنة اللي فاتت منصة بس.
هشام ماجد: أنا قاصد الاختفاء وعدم الظهور في البرامج
كما علق الفنان هشام ماجد على عدم ظهوره في البرامج قائلًا: مبطلعش في برامج من نوعية الاستجواب، وأنا قاصد الاختفاء لأني مش محتاج حد يعرف عن حياتي الشخصية حاجة، لأني ببيع للجمهور فن، لكن ملوش دعوة بعيلتي، ودي حاجات شخصية متتفتحش غير لناس قريبة، ومن حق النجم يعمل كده، وفيه نجوم بتحب تعرض حياتها عادي.
وتحدث الفنان هشام ماجد عن عائلته وبالتحديد والده، قائلًا: والدي كان دكتور وتوفي وأنا عندي 13 سنة ووالدتي مدرسة، وأخواتي شيرين أكبر مني بسنة ومحمود أصغر مني بـ 8 سنين، وبعد وفاة والدي ابتدت الدنيا تقل شوية، لكن والدتي عمرها ما حسستنا أننا ناقصنا حاجة، وفاة والدي أثر في حياتي لأنه كان قريب مني وأنا كنت في سن صغير، وده حصلنا كلنا، من الناحية المادية والنفسية برضو.
وأضاف: مش هعيط بعد شوية على فكرة، واللي يعرف والدي كان بيقولي أنه زملكاوي ووسيم وأخف دم في العالم، وكان بياخدني معاه ماتشات كورة وحببني في الزمالك، كان تعبان فترة طويلة وفي يوم بلغونا أنه توفي، وحصلي تروما لأن الموضوع حصل فجأة، ودي نقطة تحول في حياتي لأن شكل حياتنا اتغير، ووالدتي بقى عليها حمل كبير.
