بسمة بوسيل: شهرة تامر حسني كانت مستفزة ومخيفة بالنسبالي.. وطلعت عمرة 3 مرات بعد الطلاق
تحدثت الفنانة بسمة بوسيل لأول مرة عن أسباب انفصالها عن الفنان تامر حسني، وعن استمرار علاقتهما حتى الآن، وعودتها للغناء.
بسمة بوسيل: طلعت عمرة 3 مرات بعد الطلاق
وقالت بسمة بوسيل في تصريحات تليفزيونية: إحنا وصلنا لمرحلة مكناش بنعرف نتكلم، طبيعة شغل تامر كمان صعبة ودايما محتاجة مجهود، لكن اكتشفت إن المشكلة فيا أنا بتعلق جدا بالأشخاص، ودي أزمتي، وروحت 3 مرات عمرة في سنة واحدة، أجري على الكعبة واشتكي والحمد لله بقيت راضية.
وأضافت بسمة: لما كنت بقعد مع نفسي وأراجع شريط حياتي كنت أقول ليه يحصل فيا كده! وهو أنا عملت إيه يا رب عشان يحصل فيا كل ده؟ وكنت ببقى متضايقة جدا، وحصل خضة ليا بعد طلاقي ووفاة والدي.
واستكملت بسمة حديثها: بعد جوازي من تامر حسني حصل حملات إلكترونية وأنا خفت لأني متجوزة حد مشهور جدًا، وده كان جديد وشهرة تامر كانت مستفزة ومخيفة وكنت صغيرة جدا وكنت بهتز وكان بيجوا قدام البيت يقولوا طلقها.. وشهرته كانت مخيفة في الأول بالنسبالي، وتضحيتي مش خسارة عشان هو يستاهل، ضحيت بالغنا عشان أتجوز الراجل اللي عايزاه يكون أبو عيالي.
