أبرز تصريحات دينا: اتخانت كتير وعملت نفسي مش عارفة.. وعرضت مسرحية يوم ما دفنت جوزي
حلت الراقصة دينا، ضيفة على أحد البرامج التلفزيونية، وتحدثت خلال اللقاء عن تفاصيل حياتها الشخصية، وبداية دخولها مجال الرقص الشرقي.
أبرز تصريحات الراقصة دينا
- أنا محدش عرف يحاسبني على حاجة ولا أنا بحاسب حد.
- أنا متغيرتش من وأنا صغيرة، ومعنديش لف ودوران، وطول عمري باخد قرارات.
- كنت بحب فريدة فهمي وعاشقة لها ونفسي أبقى زيها، وكانت مصدر الطاقة في حياتي، ومن وأنا عندي 9 سنين خدت قرار أدخل فرقة رضا.
- زعل أبويا مني قواني وخلاني أنجح وأبين له إني مخسرتش ولا حاجة.
- أي حد مش عاجبه حاجة أنا بعمله بسيبه وأمشي ومبهتمش، ولو حد قال هي رقصت متدخلش بيتي تمام، الرقص عندي أهم.
- عمري ما أذيت حد حتى لو دون قصد، واللي أذوني عمري ما أذيتهم.
- إخوات الأم أقرب من إخوات الأب، لأن الأم اللي ربت.
- كل الرجالة تربية واحدة ست، والأم هي اللي بتوصل أكتر من الأب.
- أنا أقرب واحدة لـ في التصرفات وكل حاجة.
- بابا توفي في مستشفى السلام، ورقصت تاني يوم.
- جوزي لما اتوفى روحت ودفنت، ورجعت في نفس اليوم عرضت مسرحية مع الفنان عادل إمام.
- الحزن مبيتقطعش في يوم ولا 40 ولا لـ النهاردة.
- أحلى أيام برقص فيها لما ببقى موجوعة.
- الرقص هو حياتي، وبقول الناس اللي مبترقصش بتعمل إيه؟.
- والدي قاطعني سنتين لأني كنت خدت قراري في الرقص الشرقي.
- ماما كانت واثقة فيا وكانت عارفة أنا همشي إزاي، وبابا كان مرعوب عليا.
- بابا مكنش متصور أني هكمل دراستي بسبب الرقص، وأنا كنت عايزة أحط الرقص الشرقي في مكانة محترمة.
- الناس أدتني سوكسيه أني الرقاصة اللي في الجامعة، وعملت دراسات عليا علشان أثبت للمجتمع أن الرقاصة مش وحشة.
- كل اللي حصل في حياتي مسابش جوايا حاجة خالص، وعذرت كل واحد عن اللي عمله.
- أنا اتخانت كتير بس عملت نفسي مش عارفة، مبحبش أتطلق بسبب الخيانة ومبحبش أواجه الراجل إنه خاين، وأنا أقوى من كده.
- لو عايزة أتطلق هعرف أتطلق، ولو عايزة العلاقة دي تنتهي هعرف أخلي الراجل هو اللي يقولي أنا همشي، وأنا أوافق، ليه تكسري نفسك قدام حد وتباني ضعيفة؟.
- كان المفروض أعمل فيلم مع أحمد زكي ومحمد خان وجابوا مكاني نهلة سلامة، ودي من الحاجات اللي وجعتني وقعدت 3 أيام أعيط، أنا في طلاقي بزعل يومين، ودي وجعتني أكتر لأنه كان حلمي.
