أحمد فهمي: كان عندي مشكلة في القلب بسبب العصبية.. ورفضي لغناء زوجتي قفلة دماغ
كشفت الفنان أحمد فهمي، عن تعرضه لإصابة بمرض في القلب خلال عام 2016 وخضع لعملية جراحية، بجانب الحديث عن دعمه لزوجته، وعدم وقوفه أمام فكرة غنائها.
وقال أحمد فهمي في تصريحات تليفزيونية: أنا بخاف على وزني وبظبط أكلي وبحب الحلويات، وفي عام 2016 خلال موسم رمضان حسيت أن وزني زاد شويه ورحت للدكتور فطلب مني فحوصات، واكتشفت أن عندي تعب في القلب، سألني شوية أسئلة وقولته أني بلعب سكواش وكرة وبروح الجيم.
وتابع أحمد فهمي: روحت لدكتور تاني من إنجلترا وعملت فحوصات تاني وتأكد أن الصمام المترالي المسئول عن ضخ الدم للجسم، المفروض أنه بيفتح علشان يخرج الدم للجسم وميرجعش تاني للقلب، وأنا كان عندي من العصبية ارتجاع للدم في القلب، اتخضيت على نفسي وعملت عملية.
أحمد فهمي: بدعم مراتي عشان تغني صوتها حلو ورفضي لغنائها كان قفلة دماغ
أكد الفنان أحمد فهمي، عدم وقوفه أمام فكرة غناء زوجته أميرة، قائلًا: فكرة رفض غناء مراتي كل واحد مع مرور الوقت أفكاره وطموحاته تختلف وفي وقت من الأوقات كنت مثلا مش عايزها تغني ودلوقتي ادعمها أنها تغني وبساعدها في موضوع الغناء، هي صوتها حلو ورفضت أنها تغني قبل كده كان قفلة دماغ مني واعترف بغلطي، ومراتي أميرة عرفاني وأنا لسه عازف وحضرت معايا كل مراحل شغلي.
واستكمل: أبويا لما توفى كنت أنا أبو إخواتي البنات والتدخل في حياتهم كان لازم أكون موجود وضهر لهم، وأنا عندي 5 إخوات بنات والوقوف بجانبهم مش غلط ده العكس، وعمري ما كنت أناني ولا مدلع وابويا فرض عليا طريقة في التعامل عشان أطلع راجل لأني كنت متربي وسط بنات.
أحمد فهمي: أنا مدمن شراء جزم.. وطول عمري عيني مليانة وعمري ما بصيت لحد
كما تحدث الفنان أحمد فهمي، قائلًا: عندي عقدة من الأحذية، وأنا صغير كنا عيلة كبيرة ومرتب والدي كان قليل وكان بيجيب لي جزمة واحدة في السنة، عيد ومدرسة وكل حاجة، وكان ضد ألعب بيها كرة وكنت بلمعها علطول.
وتابع: لما كبرت وبقيت أشتغل بقيت مدمن جزم وممكن اشتري جزمة عشان عجبتني شكلها وممكن ملبسهاش، ولكن طول عمري عيني مليانة وعمري ما كنت ببص لحد.
وأضاف: لو معايا ومش معايا أنا تمام واللي باخذ بالي منه دلوقتي المستقبل عشان مراتي وعيالي وأسرتي، وبعرف احوش، وبعرف اقسم الفلوس ما بين تحويش وصرف وأنا شخص كريم وبحب استمتع بحياتي.
