ليلى عبد اللطيف: سعيت لمقابلة الشيخ الشعراوي وليا سر عند ربنا.. وهذه معجزة شفائي
كشفت عالمة الفلك ليلى عبد اللطيف، عن سبب سعيها لمقابلة الشيخ الشعراوي، بجانب كشف تفاصيل معجزة شفائها بعدما كانت على حافة الموت على حد تعبيرها.
وقالت ليلى عبد اللطيف، في حوارها مع الإعلامية بسمة وهبة في برنامج العرافة، المذاع عبر شاشة قناة النهار: سعيت أقابل الشيخ الشعراوي لأني تعبت وعايزة أعرف إيه اللي عندي، ومعرفتش أقابله، أنا ليا سر عند رب العالمين، ومش عايزة ألجأ لشيخ.
أما عن معجزة شفائها، فقالت ليلى عبد اللطيف: الدكتور قال لوالدتي إني هموت وكان وزني 37 كيلو، وشُفت واحد داخل الأوضة وأنا بين الحياة والموت، وكان معاه قطنة فيها ماية ووضعها على فمي، وكنت بحاول أنادي على أختي صوتي مكنش طالع، وبعد ساعتين راحت الحرارة وكل حاجة وخفيت، والدكتور قال دي معجزة عند ربنا.
وعن المشهد الآخر، الذي لن تنساه في حياتها، قائلًا: أنا عندي 11 سنة لما كنت في دار الأيتام، كان في قفص في المطبخ ونزلت في الليل وجبت برتقالة علشان أكلها إيدي اتخربشت ولاقيت الناظرة خدت البرتقالة من إيدي وطلعتني وأنا ببكي، وسمعت حد بيعيط وبينادي عليا، ولاقيت برتقالتين على السلم.
ليلى عبد اللطيف: اتظلمت كتير وأنا صغيرة
وتابعت: أي شيء بتمناه من وأنا طفلة بحصل عليه، وأي حد بيأذيني أو بيأذي أمي أو حد من إخواتي، بحس إن حصل له حاجة، أنا بقول بس حسبي الله ونعم الوكيل ومبدعيش على حد، وأنا اتظلمت كتير من وأنا طفلة، وأمي حطتني أنا وإخواتي البنات 2 في ملجأ علشان لما بابا مات كان عندها 23 سنة، وجدي جوزها وخلفت 3 صبيات.
وأضافت: العذاب اللي شوفته في الملجأ ماحدش شافه، وكنت بتبسط لما حد يجي يتبناني في رمضان ويعشيني برا، لو كتبت قصة حياتي هأذي ولادي من اللي شُفته.
