ليلى عبد اللطيف: توقعت وفاة جدي وزوجي.. وبيقولوا الماسونية بتقولي مخططات وأنا بريئة من الجن
أكدت عالمة الفلك اللبنانية ليلى عبد اللطيف، أنها ليس لها أي علاقة بالماسونية أو تسخير الجن، موضحة أنها صاحبة إلهام قوي بالأحداث، كما أن والدها كان يتميز بإلهامه القوي ولكنه لم يعلن عن ذلك.
وقالت ليلى عبد اللطيف، في حوارها مع الإعلامية بسمة وهبة في برنامج العرافة، المذاع عبر شاشة قناة النهار: والدي كان شيخ أزهر وأنا مؤمنة وبصوم رمضان، ووالدتي بتقولي أن والدي كان عنده إحساس بالأحداث زيي ومكنش بيعلن، وجالي إلهام وأنا عندي 12 سنة أن جدي هيسافر ومش هنشوفه تاني، وتوفى في الحج، وأني مش هتجوز خطيبي وأنا عندي 17 سنة، وجاله سرطان وتوفى، وأنا لا أفهم بالتوقعات والتنبؤات ولا الجن، أنا بريئة من كل ده.
وتابعت ليلى عبد اللطيف: كتير قالوا إن أنا الماسونية بتقولي التوقعات والجن والمخططات، يعني الماسونية بيخططوا وبيقولوا للرئيس السيرلانكي أهرب؟، واللي عايز يعمل مخططات هيعلن عنها؟، وأنا معرفش إزاي الإلهام بيجيلي ولا حد هيعرف غير رب العالمين.
وأضافت ليلى عبد اللطيف، أنها توقعت وفاة زوجها الأول، قائلة: أنا عيشت مع زوجي الأولاني أبو أولادي 13 سنة ومشافش مني لا جن ولا أي شيء، وإلا مكنش هيقعد معايا ساعة واحدة، وجوزي مكنش بيأمن بالحاجات دي، وتوفى بعد ما جاله فيروس في النخاع الشوكي، وأنا جالي كهرباء زيادة في المخ وكان عندي إحساس أنه هيجي له وعكة صحية.
