أبرز تصريحات سلوى محمد علي: الفن مش رسالة.. وعايزة أعيد تقديم مسرحية أحلام شقية
كشفت الفنانة سلوى محمد علي، أسرارًا عن حياتها، خلال حلولها ضيفة على برنامج نجوم إف إم مع الإعلامية إنجي علي، حيث سردت خلال اللقاء ذكرياتها مع الطفولة، ورأيها في الأعمال الفنية التي تقدم حاليًا، وكيف تتعامل مع الانتقادات التي توجه لها.
ونستعرض لكم أبرز تصريحات سلوى محمد علي في برنامج أسرار النجوم:
ـ أنا من جيل الشوارعية وطفولتي كلها كانت في الشوارع، وجيلنا مبيخافش من الشارع أنا بحبه وبحب السوق.
ـ زمان كنا بنمشي بالفوانيس، وكل واحد يوري التاني فانوسه، بس دلوقت فانوس رمضان بـ 4000 جنيه.
ـ أنا وأختي عملنا مقلب في المسحراتي، واستعنا بفكرة لـ سميرغانم من مسرحية حواديت.
ـ ماتضيقتش من انتقاد الجمهور ليا بسبب التدخين، أنا بشتغل ممثلة وحياتي للسوشيال ميديا، بعرض شغلي على الجمهور، وارد يكون دمي تقيل على حد ومش متقبله.. والشغلانة بتعلم الواحد إنه على طول بيُنتقد ويتُشتم، معروفه أي شخصية عامة بتتشتم.
تصريحات سلوى محمد علي
ـ وقت وفاة أمي لقيت تعليق من واحدة ست بتقول إمها إي اللي ماتت دا العيال بتموت في فلسطين ليل نهار، لو بتقولي دورك وحش هقول حقك بس انتي بتتكلمي في إيه دي أمي.
-عندنا في السيرة الذاتية بنطلع الفنانين ملايكة بس إحنا بني آدمين، وبحب ديمًا أعمل الست العادية في الشخصيات لأنها أصعب.
ـ تمثيل الشخصيات الفاشلة على المستوى الفني أحسن من الناجحين.
ـ نفسي أعيد مسرحية أحلام شقية مع عايدة عبد العزيز تاني في الجنة، والفن مش رسالة وبكره الجملة دي رسالتنا التسلية، وبشوف إن تكريم الممثل في إن الجمهور يعجب بيه.
ـ برفض فكرة استئجار الرحم، فكرة قاسية يعني إيه واحدة تخلف طفل وتروح تسيبه بد ماتولده دا شعور مؤلم جدًا.
