انتصار: مش عارفة إزاي يطلعوني أم منذر رياحنة.. والكلام عن حقوق المرأة بيعمل عداء مع الرجالة
حلت الفنانة انتصار، ضيفة على الإعلامية سارة الدندراوي، في برنامج تفاعلكم، وتحدثت خلال اللقاء عن تفاصيل أعمالها الرمضانية، وعلقت على تصريحات الدفاع عن الرجل.
أبرز تصريحات انتصار في برنامج تفاعلكم
- مكنتش متوقعة إن مسلسل أعلى نسبة مشاهدة يعمل النجاح ده، ورد الفعل كان من أول حلقة من قبل ما رمضان يبدأ.
- أنا مريت بالنجاح ده قبل كده مش متفاجئة بيه ولكن متفاجئة إن ده حصل من أول يوم رمضان.
- شخصيتي في أعلى نسبة مشاهدة شبه الأمهات اللي بتكره عدوها اللدود اللي دخل البيت اللي هو التليفون، خلى العيال ولا بتذاكر ولا بتنام وبوظ التواصل الاجتماعي اللي بين الأسرة.
- بحب السوشيال ميديا وبحس أني بشوف الدنيا ومبقاش في مسافات، ولكن ميبقاش بياخد وقت وطاقة وتفكير ويمنعنا نشوف الدنيا، في ناس مبتشوفش النور.
- شعري كان متحني في مسلسل أعلى نسبة مشاهدة، لأن المخرجة قالت الشخصية من بيئة فقيرة لما تحب تصبغ هتعمل حنة، وطلعت مفيدة وأحسن من الصبغة ياريت كل الستات تستعملها، وشكلي هكمل فيها للأبد.
- مش عارفة إزاي طالعة أم منذر رياحنة في مسلسل المعلم.
- من وأنا صغيرة بعمل دور أم، طلعت أم أحمد الفيشاوي أحمد عزمي، وممكن أعمل أم يحيى الفخراني ويسرا لكن أم منذر رياحنة لأ، هو أسمراني ووشه جبلي، فمش قادرة حطوه جنبي وشوفوا ينفع أبقى أمه ولا لأ.
- أنا بقول رأيي يعمل جدل أو ميعملش بقوله، لأن الفنان بيبقى حياته مش ملكه لأن مفيش حاجة عنده بتستخبى.
- المنطقة كلها حقوق المرأة والمرأة طلع لها أنياب، مافيش حد بيقول حقوق الرجل، هنفضل لغاية إمتى بنعمل مشاكل مع الرجالة؟ خلونا قاعدين جنب الحيط.
- مش عايزين نزعل الرجالة ويسنوا أسنانهم علينا، عايزينهم هاديين وفي أولاد ومودة ورحمة، لكن الندية الدنيا مش هتمشي وهيبقى في عداء طول ما كل واحدة بتطلع تتكلم عن حقوق المرأة.
- لو الراجل بيعامل والدته كويس أعرفي أنك هتتجوزي راجل عظيم، ولو بيعامل والدته وإخواته وحش اعرفي أنه هيعاملك أنتي وولادك وحش، على حسب اللي ربته.
