أبرز تصريحات بوسي: أمي عملت عمرة وسابت شغلها قبل ما تموت.. وعمري ما قصرت مع أبويا
حلت الفنانة بوسي، ضيفة على أحد البرامج التليفزيونية، وتحدثت خلال اللقاء عن تفاصيل أزمة والدها الراحل، وعلقت على تصريحات الفنان سعد الصغير بشأن مساعدته لوالدها.
أبرز تصريحات بوسي التليفزيونية
- أمي اشتغلت فترة صغيرة بس على كبر، ولكن سابت الشغلانة وراحت عملت عمرة، وبعدين انفصلت عن أبويا وهي حامل فيا في شهرين، وأنا حسيت إن الضغط كبير عليها واشتغلت من وأنا عندي 15 سنة.
- أمي ماتت وأنا عندي 17 سنة وملحقتش أشبع منها، تعبت كتير في حياتها واتظلمت كتير.
- أنا اتجوزت على سنة الله ورسوله بعد طلاقي من وليد فطين وقبل جوازي من هشام ربيع، ولكن مش محتاجة أقول هو مين ولا أجيب اسمه، ده راجل ليه بيت وعيلة.
- الموضوع خلص وكل واحد فينا راح لحاله وأنا مبعملش حاجة غلط وقبل ما بحترم نفسي بحترم ابني وبعمل حسابه في كل خطوة.
- سعد الصغير ده أنا متقارنش بيه ومعرفش اللي بيعمله ده غيرة ولا إيه، وهو عايز مني إيه ولا ده لمصلحة مين ولا بتعمل أي بروباجندا علشان الناس تاخد بالها منك، ليه ما بتصدق أي حد يقول حاجة تقوم فارش الملاية؟.
- هو أنا مستنية حد يعمل اللي سعد الصغير قال إنه عمله لأبويا؟ هو لما حد يجيبلي أنتريه ولا ثلاجة ولا بوتاجاز بـ 50 ولا 60 ألف جنيه مش هعرف أعمل ده؟.
- أنا ياما عملت كتير وإخواتي عارفين، وأخويا اللي جاب أبويا يقعده في شقة أمي لأنه مبيدفعش الإيجار، وأنا عمري ما قصرت مع أبويا.
- كان عندي واحدة بتشتغل عندي وكانت قريبة مني وقولت لـ هشام ربيع وقت جوازنا أنها أختي، وجوازي من هشام هو اللي طلع السواد اللي جواها كله ومش عارفة الحقد والسواد ده ليه، وكانت بتحضنه أحضان مش مظبوطة.
- سرقتني على مدار 10 سنين، وهي كانت أول مرة تشتغل في بيوت وعرفت تدخل لي، وهي فعلًا كانت أقرب واحدة ليا وكانت بتبعد كل اللي حواليا، ومشيتها من حياتي لما حطلتي برشام منوم في الأكل في رمضان.
- كانت عاملة نسخ على مفاتيحي وبتاخد عربيتي والسواق بتاعي كان ماشي معاها، وكانت بتتمنظر بحياتي.
- أنا عزمت محمود الليثي على فرحي وكان عارف ميعاده قبل حتى ما أحجز القاعة، وكل واحد له ظروفه وهو أخويا وحبيبي.
- لاقيت برطمان فوق الدولاب معمولي عمل فيه على جلد غزالة، وواجهت طليقي الراحل وليد فطين وقالي إن أخته عملته علشان تهدي الدنيا بيني وبينه، ومنعت أخته وأهله يدخلوا البيت قبل طلاقنا.
- أبويا مكنش محتاج وإخواتي كانوا حواليه وأنا موجودة وأخويا حي يرزق، وعلاقتي بـ إخواتي من أبويا مش أحسن حاجة بحكم إني هنا.
- عمري ما استلفت جنيه من سعد الصغير، وربنا ما يحوجني لحد، ده أخويا ابن أمي وأبويا عمري ما خدت منه جنيه.
