محمد سامي: محمد رمضان نجم ونجوميته مبالغ فيها.. ومتصنف إنه فتوة الشعبيين زي فريد شوقي
كشف المخرج محمد سامي، سر نجاحه الدائم مع الفنان محمد رمضان، وآخرها مسلسل جعفر العمدة الذي عرض في السباق الرمضاني الماضي 2023، وحقق نجاحًا ساحقًا في الوطن العربي.
وقال محمد سامي في تصريحات تلفزيونية: محمد رمضان ممثل مهم وموهبة مهمة، ولكن مهما كان فهو في احتياج لفريق عمل قوي حواليه ومخرج قوي، هو عنده كاريزما لكن مش مسئول عن كل العناصر.
وتابع محمد سامي: اشتغلت مع غادة عبد الرازق والسقا وتامر حسني، لكن شغل محمد رمضان كان نجاح استثنائي، وده بسبب أن كيميتنا راكبة أوي مع بعض، وبنفهم بعض بالإشارة.
وأضاف: محمد رمضان طيب ومش بيفكر ينجح مع حد غيري عشان يثبت حاجة معينة، لأنه مش بالشر ده، وهو نجم مبالغ في نجوميته وهو عارف إنه ناجح دايمًا.
وأردف سامي قائلًا: محمد رمضان متصنف فتوة الشعبيين لأن فريد شوقي فضل كده طول عمره، وأنا ضد تغيير جلد الفنانين، لأن أحمد زكي فيه حاجات مصدقتوش فيها وأنا أقل من أني أقيّمه، لكن الأستاذ عادل إمام هو الأنجح على الإطلاق، وهو البهجة والانبساط ووظف نفسه حلو وعمل كل حاجة.
أما عن الجزء الثاني لجعفر العمدة، فعلق المخرج محمد سامي: جعفر العمدة مالوش إلا جزء، فكرة الجزء التاني فكرة المنتج محمد السعدي وكنا رافضينها أنا ورمضان وكتبت منه 17 حلقة محبتوش، لأن ليه أعيد أجزاء وتكرار لما ممكن أعمل حاجة تاني وأنجح بيها.
