ميكب أرتست تستغيث من طليقها: شوه جسمي عشان خلعته.. أموّت نفسي عشان أرتاح؟| صور
تعرضت سيدة تدعى هينار عاطف ميكب أرتست، للاعتداء بالضرب على يد طليقها التي عاشت معه 14 عاما أذاقها خلالها أنواع الألم والحسرة، فأقامت دعوى خلع بعد استحالة العيش معه، وحكمت المحكمة بالتفريق بينهما، فظل يطاردها ويتهجم عليها بعد الخلع، الأمر الذي جعلها تحرر عدة محاضر وتقيم عدة دعاوى ضده لتحصل على أحكام، وفي النهاية تنازلت من أجل أولادها ووعدها بعدم مضايقتها مرة أخرى، لكن عاد وتعدى عليها وأصابها بعدة إصابات.. حسب كلامها عبر صفحتها بمواقع التواصل الاجتماعي فيسبوك.
سيدة تستغيث من طليقها بعد تعديه عليها بالضرب
قالت هينار عاطف ضحية اعتداء طليقها عبر صفحتها بمواقع التواصل الاجتماعي فيسبوك، إنها خلعت زوجها بمحكمة الأسرة منذ فترة، ومنذ ذلك الوقت وهو يتهجم عليها ويطاردها، موضحة: أنا بقالي سنة عاملة الخلع ومطلقة، ومن ساعتها وهو بيتعرضلي ويتهجم عليا وبيضربني كل شوية، وعملت محاضر وقضايا، وهو برضه مش راضي يسيبني في حالي ولا يبعد عن طريقي، واخده حكمين وكان لسه فيه حكم تالت، وقال خلاص مش هاجي جمبها تاني ولا هقربلها بس تتنازل".
وزعمت هينار ضحية اعتداء طليقها: رحت عشان خاطر أولادي وتنازلت عن حقي، وقلت خلاص وحلف بعياله أنه مش هيوريني وشه تاني، لكن بعد أسبوع واحد جه اتهجم عليا تاني، أنا مش مراته ولا على ذمته ولا أخصه عشان كل شوية يتهجم عليا بالمنظر دا ويضربني، وعلطول تهديد وقلة أدب وإهانة، وأنا اتنازلت عن حقي وعن عربيتي اللي نصب عليا فيها وسرقها، وفلوسي وشقى عمري، ومرضتش أفضحه عشان عيالي.
وادعت ضحية اعتداء طليقها عبر صفحتها إلى أن الثلاثاء الماضي كانت في خروجة، وكان طليقها موجودا في نفس المكان، حيث اعتدى عليها أمام الموجودين، مردفة: يوم الثلاثاء اللي فات كنت خارجة، وهو كان موجود في نفس المكان، وقدام الناس كلها اتهجم عليا قدام الناس وضربني، متسائلة: أنا أستاهل فعلا الضرب علشان تنازلت عن حقي ومحبستهوش لأن دا إنسان مريض، طب قدام الدنيا كلها دا، أعمل في نفسي أي تاني؟، سبتله الدنيا كلها ومشيت مش عايزاه مش عايزاه، هفضل أنضرب كدا وأتبهدل في الدنيا عشان خايفة على ولادي؟، وعشان الناس والكلام؟، دي يرضي مين إن واحد يبقى مفتري كدا استحملته 14 سنه قلة أدب وإهانة، أعمل إيه تاني؟، أنا مش مراته يعني ملهوش دعوة بيا أبدا ولا ليه حق عندي.
ونوهت ضحية إعتداء زوجها عبر صفحتها: أنا بعد البوست دا هيجيلي وهيضربني تاني، بس المرة دي الدنيا كلها عرفت حقيقته وأظن الدنيا كلها عارفة أصلك وأصلي، حسبي الله ونعم الوكيل فيك ليوم الدين قادر ربنا يوريني فيك كل اللي عملته فيا يارب تدوقه، ربنا ينتقم منك ويحرق قلبك وحسبي الله ونعم الوكيل فيك، هفضل أدعي عليك لآخر نفس فيا، ربنا ينتقم منك يا مفتري ياللي بهدلتني وذلتني في الدنيا.
واختتمت السيدة هينار عاطف: أنا مش عايزاه، ولو هموت ومش هرجعله برضو، أنا أموت نفسي وأموت كافرة، ولا أن أتذل كل الذل دا من واحد مريض نفسيا كدا، خلاص أنا مفيش حاجة في إيدي تاني، محدش همه، وعارف أني مش هأذيه عشان عيالي، فبيبهدل فيا بقالو قد إيه، أروح فين؟، وأقول لمين ينجدني يا ناس، لحد إمتى!؟ أموت نفسي وأرتاح أنا سبتله كل حاجة، وسبتله الدنيا كلها ومشيت؟! أعمل إيه؟!
